bhuul jaane kā mujhe mashvara dene vaale

yaad ḳhud ko bhī na maiñ aa.uuñ kuchh aisā kar de

bhul jaane ka mujhe mashwara dene wale

yaad KHud ko bhi na main aaun kuchh aisa kar de

raat ke lamhāt ḳhūnī dāstāñ likhte rahe

sub.h ke aḳhbār meñ hālāt behtar ho ga.e

raat ke lamhat KHuni dastan likhte rahe

subh ke aKHbar mein haalat behtar ho gae

kuchh ehtiyāt parinde bhī rakhnā bhuul ga.e

kuchh intiqām bhī āñdhī ne badtarīn liye

kuchh ehtiyat parinde bhi rakhna bhul gae

kuchh intiqam bhi aandhi ne badtarin liye

maiñ ajnabī huuñ magar tum kabhī jo sochoge

koī qarīb kā rishta zarūr niklegā

main ajnabi hun magar tum kabhi jo sochoge

koi qarib ka rishta zarur niklega

kuchh nau-javān shahr se aa.e haiñ lauT kar

ab daav par lagī huī izzat hai gaañv kī

kuchh nau-jawan shahr se aae hain lauT kar

ab daw par lagi hui izzat hai ganw ki

ham tirī talḳh guftugū sun kar

chup haiñ lekin sabab samajhte haiñ

hum teri talKH guftugu sun kar

chup hain lekin sabab samajhte hain

DhūñDne vaale ġhalat-fahmī maiñ the

vo anā ke saath apne sur meñ thā

DhunDne wale ghalat-fahmi main the

wo ana ke sath apne sur mein tha

milnā paḌtā hai hameñ ḳhud se bhī ġhairoñ kī tarah

us ne māhaul hī kuchh aisā banā rakkhā hai

milna paDta hai hamein KHud se bhi ghairon ki tarah

us ne mahaul hi kuchh aisa bana rakkha hai

vo gulābī bādaloñ meñ ek niilī jhiil sī

hosh qaa.em kaise rahte thā hī kuchh aisā libās

wo gulabi baadalon mein ek nili jhil si

hosh qaem kaise rahte tha hi kuchh aisa libas

kitne zehnoñ ko kar gayā gumrāh

ik baḌe aadmī kā chhoTā-pan

kitne zehnon ko kar gaya gumrah

ek baDe aadmi ka chhoTa-pan

bachcha majbūriyoñ ko kyā jaane

ik khilaunā ḳharīdnā thā mujhe

bachcha majburiyon ko kya jaane

ek khilauna KHaridna tha mujhe

har shaḳhs apnī apnī jagah yuuñ hai mutma.in

jaise ki jāntā ho qazā kā hai ruḳh kidhar

har shaKHs apni apni jagah yun hai mutmain

jaise ki jaanta ho qaza ka hai ruKH kidhar

husn utnā ek paikar maiñ simaT saktā nahīñ

tū bhī mere hī kisī ehsās kī tasvīr hai

husn utna ek paikar main simaT sakta nahin

tu bhi mere hi kisi ehsas ki taswir hai

diloñ ke biich kī dīvār gir bhī saktī thī

kisī ne kaam liyā hī nahīñ tadabbur se

dilon ke bich ki diwar gir bhi sakti thi

kisi ne kaam liya hi nahin tadabbur se

qānūn jaise kho chukā sadiyoñ kā e'timād

ab kaun dekhtā hai ḳhatā kā hai ruḳh kidhar

qanun jaise kho chuka sadiyon ka e'timad

ab kaun dekhta hai KHata ka hai ruKH kidhar

ujaaḌ taptī huī raah meñ bhaTakne lagī

na jaane phuul ne kyā kah diyā thā titlī se

ujaD tapti hui rah mein bhaTakne lagi

na jaane phul ne kya kah diya tha titli se

vo patā apnī shāḳh se zarā judā huā hī thā

na jaane phir kahāñ kahāñ havā uḌā ke le ga.ī

wo pata apni shaKH se zara juda hua hi tha

na jaane phir kahan kahan hawa uDa ke le gai

ik qism aur zinda rahne kī

vaar tīkhā sahī muqaddar kā

ek qism aur zinda rahne ki

war tikha sahi muqaddar ka

bolte rahte haiñ nuqūsh us ke

phir bhī vo shaḳhs kam-suḳhan hai bahut

bolte rahte hain nuqush us ke

phir bhi wo shaKHs kam-suKHan hai bahut

mire charāġh kī nannhī sī lau se ḳhā.if hai

ajiib vaqt paḌā hai siyāh āñdhī par

mere charagh ki nannhi si lau se KHaif hai

ajib waqt paDa hai siyah aandhi par

vo andhī raah meñ bīnā.iyāñ bichhātā rahā

badan pe zaḳhm liye aur laboñ pe diin liye

wo andhi rah mein binaiyan bichhata raha

badan pe zaKHm liye aur labon pe din liye

shafaq sī phir koī utrī hai mujh meñ

ye kaisī raushnī phailī hai mujh meñ

shafaq si phir koi utri hai mujh mein

ye kaisi raushni phaili hai mujh mein