jī meñ Thānī hai ki jiinā hai bahar-hāl mujhe

jis ko marnā hai vo chup-chāp hī martā jaa.e

ji mein Thani hai ki jina hai bahar-haal mujhe

jis ko marna hai wo chup-chap hi marta jae

koī bādal mere tapte jism par barsā nahīñ

jal rahā huuñ jaane kab se jism kī garmī ke saath

koi baadal mere tapte jism par barsa nahin

jal raha hun jaane kab se jism ki garmi ke sath

na jaane kab vo palaT aa.eñ dar khulā rakhnā

ga.e hue ke liye dil meñ kuchh jagah rakhnā

na jaane kab wo palaT aaen dar khula rakhna

gae hue ke liye dil mein kuchh jagah rakhna

taaq par juzdān meñ lipTī duā.eñ rah ga.iiñ

chal diye beTe safar par ghar meñ maa.eñ rah ga.iiñ

taq par juzdan mein lipTi duaen rah gain

chal diye beTe safar par ghar mein maen rah gain

us ke chehre kī chamak ke sāmne saada lagā

āsmāñ pe chāñd puurā thā magar aadhā lagā

us ke chehre ki chamak ke samne sada laga

aasman pe chand pura tha magar aadha laga