aatā hai jo tūfāñ aane de kashtī kā ḳhudā ḳhud hāfiz hai

mumkin hai ki uThtī lahroñ meñ bahtā huā sāhil aa jaa.e

aata hai jo tufan aane de kashti ka KHuda KHud hafiz hai

mumkin hai ki uThti lahron mein bahta hua sahil aa jae

ishq kā ejaaz sajdoñ meñ nihāñ rakhtā huuñ maiñ

naqsh-e-pā hotī hai peshānī jahāñ rakhtā huuñ maiñ

ishq ka ejaz sajdon mein nihan rakhta hun main

naqsh-e-pa hoti hai peshani jahan rakhta hun main

'bahzād' saaf saaf maiñ kahtā huuñ hāl-e-dil

sharminda-e-kamāl mirī shā.irī nahīñ

'bahzad' saf saf main kahta hun haal-e-dil

sharminda-e-kamal meri shairi nahin

maiñ DhūñDh rahā huuñ mirī vo sham.a kahāñ hai

jo bazm kī har chiiz ko parvāna banā de

main DhunDh raha hun meri wo shama kahan hai

jo bazm ki har chiz ko parwana bana de

ham bhī ḳhud ko tabāh kar lete

tum idhar bhī nigāh kar lete

hum bhi KHud ko tabah kar lete

tum idhar bhi nigah kar lete

ai dil kī ḳhalish chal yūñhī sahī chaltā to huuñ un kī mahfil meñ

us vaqt mujhe chauñkā denā jab rañg pe mahfil aa jaa.e

ai dil ki KHalish chal yunhi sahi chalta to hun un ki mahfil mein

us waqt mujhe chaunka dena jab rang pe mahfil aa jae

zinda huuñ is tarah ki ġham-e-zindagī nahīñ

jaltā huā diyā huuñ magar raushnī nahīñ

zinda hun is tarah ki gham-e-zindagi nahin

jalta hua diya hun magar raushni nahin

vafāoñ ke badle jafā kar rahe haiñ

maiñ kyā kar rahā huuñ vo kyā kar rahe haiñ

wafaon ke badle jafa kar rahe hain

main kya kar raha hun wo kya kar rahe hain

go muddateñ huī haiñ kisī se judā hue

lekin ye dil kī aag abhī tak bujhī nahīñ

go muddaten hui hain kisi se juda hue

lekin ye dil ki aag abhi tak bujhi nahin

ai jazba-e-dil gar maiñ chāhūñ har chiiz muqābil aa jaa.e

manzil ke liye do gaam chalūñ aur sāmne manzil aa jaa.e

ai jazba-e-dil gar main chahun har chiz muqabil aa jae

manzil ke liye do gam chalun aur samne manzil aa jae

mujhe to hosh na thā un kī bazm meñ lekin

ḳhamoshiyoñ ne merī un se kuchh kalām kiyā

mujhe to hosh na tha un ki bazm mein lekin

KHamoshiyon ne meri un se kuchh kalam kiya