mauj-e-KHun

mujhe qatl kar ke kahāñ jā rahe ho

zarā apnā dāman to dekho

bahāroñ kā paiġhām laa.e ho yā tum ne holī manā.ī hai

mere lahū se

ye ḳhuuñ meñ nahāyā huā tez ḳhanjar

jise tum ne hāthoñ kā zevar banāyā thā

ab ḳhaak par loTtā hai

mirī shāh-rag kaaT kar

merī hasrat-zada laash par qatra qatra lahū ro rahā hai

yahī merā mūnis hai ab aur dushman tumhārā

baḌhāo zarā haath is ko uThā lo

magar haath kyuuñ kāñpte haiñ tumhāre

tumhāre laboñ par

ye kyuuñ dashna-e-ḳhūñ-chakāñ kī tarah papḌiyāñ jam ga.ī haiñ lahū kī

chhupā lo ye ḳhanjar

magar apne yaḳh-basta hoñToñ kī ḳhūñ-rang tahrīr

kab tak chhupāte phiroge

laboñ par zabāñ pher kar muskurāne se kuchh bhī na hogā

tumhārī riyā-kār āñkhoñ ke in ā.īnoñ se nikal kar

maiñ apnī kahānī sunātā rahūñgā

tumhāre qafas-e-rang maqtal meñ madfūn rūhoñ ko

pur-haul ḳhvāboñ kī tārīk vaadī se

din ke ujāle meñ vāpas bulātā rahūñgā

mujhe qatl kar ke kahāñ jā rahe ho

zarā apne dil meñ to jhāñko

vahī merā mūnis vahī ḳhūn-āshām ḳhanjar

vahāñ tiir kī tarh paivast hai yā nahīñ hai

maiñ zinda huuñ tum mar chuke ho

maiñ zinda huuñ tum mar chuke ho

mujhe qatl kar ke kahan ja rahe ho

zara apna daman to dekho

bahaaron ka paigham lae ho ya tum ne holi manai hai

mere lahu se

ye KHun mein nahaya hua tez KHanjar

jise tum ne hathon ka zewar banaya tha

ab KHak par loTta hai

meri shah-rag kaT kar

meri hasrat-zada lash par qatra qatra lahu ro raha hai

yahi mera munis hai ab aur dushman tumhaara

baDhao zara hath is ko uTha lo

magar hath kyun kanpte hain tumhaare

tumhaare labon par

ye kyun dashna-e-KHun-chakan ki tarah papDiyan jam gai hain lahu ki

chhupa lo ye KHanjar

magar apne yaKH-basta honTon ki KHun-rang tahrir

kab tak chhupate phiroge

labon par zaban pher kar muskurane se kuchh bhi na hoga

tumhaari riya-kar aankhon ke in aainon se nikal kar

main apni kahani sunata rahunga

tumhaare qafas-e-rang maqtal mein madfun ruhon ko

pur-haul KHwabon ki tarik wadi se

din ke ujale mein wapas bulata rahunga

mujhe qatl kar ke kahan ja rahe ho

zara apne dil mein to jhanko

wahi mera munis wahi KHun-asham KHanjar

wahan tir ki tarh paiwast hai ya nahin hai

main zinda hun tum mar chuke ho

main zinda hun tum mar chuke ho