dozaKH

zulmat kā darbār sajā to

sūraj kī ḳhairāt se raushan hone vaalī saarī āñkheñ

pal meñ ho ga.iiñ kor

pachchhim kī tārīkī meñ dil Duub ga.e

aur TuuT ga.e sab zor

bahutoñ ko mā'lūm huī us shab apnī auqāt

dil ke andar muddat se jo khaTak rahī thī

aaj khulī vo baat

shab ke sannāTe meñ goyā ḳhvābīda thā

duniyā bhar kā shor

kaan paḌī āvāz sunā.ī na detī thī

raah sujhā.ī na detī thī

chaah 'amīq aur agle qadam meñ kitnā bo'd hai

thā kis ko mā'lūm

raste saare band galī meñ khulte the

aur manzil thī mā'dūm

raushniyāñ mamnū' huī thiiñ

tāroñ kī maddham sī lau aur us mā'tūb jazīre ke mābain tanī thī

ek ghaTā ghanghor

shahr-e-fanā kī be-hālī par ashk-fishāñ thā bādal bhī us raat

dil meñ ghuT ke

chupke chupke sisak rahā thā sab ke dil kā chor

jīvan nark banā aur ho gayā marnā bhī dushvār

nit rahne vaalī chintā thī zulmat kā darbār

zulmat ka darbar saja to

suraj ki KHairaat se raushan hone wali sari aankhen

pal mein ho gain kor

pachchhim ki tariki mein dil Dub gae

aur TuT gae sab zor

bahuton ko ma'lum hui us shab apni auqat

dil ke andar muddat se jo khaTak rahi thi

aaj khuli wo baat

shab ke sannaTe mein goya KHwabida tha

duniya bhar ka shor

kan paDi aawaz sunai na deti thi

rah sujhai na deti thi

chah 'amiq aur agle qadam mein kitna bo'd hai

tha kis ko ma'lum

raste sare band gali mein khulte the

aur manzil thi ma'dum

raushniyan mamnu' hui thin

taron ki maddham si lau aur us ma'tub jazire ke mabain tani thi

ek ghaTa ghanghor

shahr-e-fana ki be-haali par ashk-fishan tha baadal bhi us raat

dil mein ghuT ke

chupke chupke sisak raha tha sab ke dil ka chor

jiwan nark bana aur ho gaya marna bhi dushwar

nit rahne wali chinta thi zulmat ka darbar