hausle ka TuTta nasha

zindagī kā safar chal rahā hai magar

raah ke pech o ḳham aur masā.il ke bhuut

dhund kī kaalī talvār hāthoñ meñ le kar

mire sāmne aate jaate rahe

ḳhvāhishoñ kī kiran ḳhvāb kī raushnī jagmagātī rahī

ārzūoñ kī takmīl par

ik na.ī aarzū sar uThātī rahī

ibn-e-ādam huuñ maiñ

'aql aur āgahī merī pahchān hai

āsmān-o-zamīñ kī sabhī ne'mateñ

ḳhushbūeñ 'aurateñ

peḌ-paude samundar nadī phuul phal

merī ḳhātir hai sab kī numūd

sab ye sach hai magar ek sach ye bhī hai

saañs kī Doriyoñ se banā hausla

saañs ke saath hī TuuT jaane ko hai

maut kā devtā

apnī is fat.h par muskurāne ko hai

zindagi ka safar chal raha hai magar

rah ke pech o KHam aur masail ke bhut

dhund ki kali talwar hathon mein le kar

mere samne aate jate rahe

KHwahishon ki kiran KHwab ki raushni jagmagati rahi

aarzuon ki takmil par

ek nai aarzu sar uThati rahi

ibn-e-adam hun main

'aql aur aagahi meri pahchan hai

aasman-o-zamin ki sabhi ne'maten

KHushbuen 'auraten

peD-paude samundar nadi phul phal

meri KHatir hai sab ki numud

sab ye sach hai magar ek sach ye bhi hai

sans ki Doriyon se bana hausla

sans ke sath hi TuT jaane ko hai

maut ka dewta

apni is fath par muskurane ko hai