utran

kabhī kahīñ par

sunā hai tum ne

ki koī apne purāne kapḌe kahīñ ġharīboñ meñ baañT de aur

phir kabhī un se jā ke pūchhe

ki kis ne pahnā vo surḳh joḌā

vo sabz chādar kise milī thī

kise milī merī niilī jacket

nahīñ sunā naañ

kisī ko fursat nahīñ hai laḌke

ki ḳhasta kapḌoñ ke rog paale

purānī ashyā pe bain Daale

yā apnī utran ke bhed rakkhe

kabhī kahīñ par

sunā hai tum ne

ki koī thak kar kisī piyāre ko duur jangal meñ chhoḌ aa.e

to muḌ ke dekhe

yā chand sāloñ ke baa'd vāpas vahīñ pe lauTe

vo jis ko chhoḌā thā lene aa.e

nahīñ sunā naañ

kisī ko hājat nahīñ hai laḌke

ki raftagāñ kā 'azāb jhele

purānī baazī ko phir se khele

kisī ke hone ko apne jiine kī shart kar le

isī liye to

mujhe nahīñ hai ye fikr bilkul

kahāñ tumhārī ye 'umr biitī

yā kaisī hālat meñ vaqt kaaTā

bichhaḌ ke mujh se kise mile tum

mujhe nahīñ hai ye fikr bilkul

ki merī utran ko kis ne pahnā

kabhi kahin par

suna hai tum ne

ki koi apne purane kapDe kahin gharibon mein banT de aur

phir kabhi un se ja ke puchhe

ki kis ne pahna wo surKH joDa

wo sabz chadar kise mili thi

kise mili meri nili jacket

nahin suna nan

kisi ko fursat nahin hai laDke

ki KHasta kapDon ke rog pale

purani ashya pe bain Dale

ya apni utran ke bhed rakkhe

kabhi kahin par

suna hai tum ne

ki koi thak kar kisi piyare ko dur jangal mein chhoD aae

to muD ke dekhe

ya chand salon ke ba'd wapas wahin pe lauTe

wo jis ko chhoDa tha lene aae

nahin suna nan

kisi ko hajat nahin hai laDke

ki raftagan ka 'azab jhele

purani bazi ko phir se khele

kisi ke hone ko apne jine ki shart kar le

isi liye to

mujhe nahin hai ye fikr bilkul

kahan tumhaari ye 'umr biti

ya kaisi haalat mein waqt kaTa

bichhaD ke mujh se kise mile tum

mujhe nahin hai ye fikr bilkul

ki meri utran ko kis ne pahna