taswir
us kī tasvīr uThā.e hue ye sochtā huuñ
ye vo āñkheñ haiñ jinheñ jhiil kahā thā maiñ ne
thī kabhī gahrī ramaq in meñ shanāsā.ī kī
ab inheñ yaad nahīñ shakl bhī saudā.ī kī
us kī tasvīr uThā.e hue ye sochtā huuñ
yahī ruḳhsār sahīfa the kabhī mere liye
in kī rangat meñ guñdhī thī mire ehsās kī lau
in se paatī thī mirī aañkh ḳhayālāt kī zau
us kī tasvīr uThā.e hue ye sochtā huuñ
maḳhmalīñ hoñT dahakte hue angāra hoñT
jin ko azbar thī kisī daur meñ peshānī mirī
ab pareshānī hai un ke liye be-mā'nī mirī
us kī tasvīr uThā.e hue ye sochtā huuñ
ye vo zulfeñ haiñ ki jin zulfoñ ke saa.e saa.e
maiñ ne jazbāt kā har zamzama ījād kiyā
haif kis vāste dil muft meñ barbād kiyā
haañ vo āñkheñ lab-o-ruḳhsār mire the hī nahīñ
jin ko paane kī ka.ī saal riyāzat kī thī
maiñ thā nādāñ ki kabhī us se mohabbat kī thī
us kī tasvīr uThā.e hue ye sochtā huuñ
us ki taswir uThae hue ye sochta hun
ye wo aankhen hain jinhen jhil kaha tha main ne
thi kabhi gahri ramaq in mein shanasai ki
ab inhen yaad nahin shakl bhi saudai ki
us ki taswir uThae hue ye sochta hun
yahi ruKHsar sahifa the kabhi mere liye
in ki rangat mein gundhi thi mere ehsas ki lau
in se pati thi meri aankh KHayalat ki zau
us ki taswir uThae hue ye sochta hun
maKHmalin honT dahakte hue angara honT
jin ko azbar thi kisi daur mein peshani meri
ab pareshani hai un ke liye be-ma'ni meri
us ki taswir uThae hue ye sochta hun
ye wo zulfen hain ki jin zulfon ke sae sae
main ne jazbaat ka har zamzama ijad kiya
haif kis waste dil muft mein barbaad kiya
han wo aankhen lab-o-ruKHsar mere the hi nahin
jin ko pane ki kai sal riyazat ki thi
main tha nadan ki kabhi us se mohabbat ki thi
us ki taswir uThae hue ye sochta hun
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
