shahr-e-dost

vo shahr-e-dost bhī

ruḳhsat huā ki jis ne sadā

hamāre dil meñ khilā.e the chāhatoñ ke gulāb

ḳhumār baaqī hai ab tak hamārī āñkhoñ meñ

hasīn lamhoñ kā jo us ke dam se raushan the

tumhāre ba.ad bhī ā.eñge yuuñ to sab mausam

bahut satā.eñge lekin har ek mauqa par

jo hote tum to

ye kaam is tarah karte

kareñge yaad tumheñ ham ka.ī havāloñ se

ajiib shaḳhs thā

kaḌvī-kasīlī sun kar bhī

na tez bolā kisī se

na vo huā nārāz

sajā.e rahtā thā hoñToñ pe chāhatoñ ke gulāb

bichhaḌ rahe ho to va.ada karo mire hamdam

kabhī jo guzro idhar se to bhuul mat jaanā

yahīñ mileñge kisī mūlsarī ke peḌ tale

kareñge bāteñ shrañgār-ras ke dohoñ kī

kareñge bāteñ bihārī kī nāykāoñ kī

kareñge bāteñ kisī ke rasīle hoñToñ kī

mahaktī zulfoñ kī kājal kī us kī bindiyā kī

lachaktī shāḳh se jismoñ kī

chāñd-chehroñ kī

bichhaḌ rahe ho to va.ada karo

ki aaoge

kabhī jo guzro idhar se to bhuul mat jaanā

tumhāre hijr ke mausam kī sabz chādar ko

maiñ apne tan pe sajā.e

yahīñ milūñgā tumheñ

wo shahr-e-dost bhi

ruKHsat hua ki jis ne sada

hamare dil mein khilae the chahaton ke gulab

KHumar baqi hai ab tak hamari aankhon mein

hasin lamhon ka jo us ke dam se raushan the

tumhaare baad bhi aaenge yun to sab mausam

bahut sataenge lekin har ek mauqa par

jo hote tum to

ye kaam is tarah karte

karenge yaad tumhein hum kai hawalon se

ajib shaKHs tha

kaDwi-kasili sun kar bhi

na tez bola kisi se

na wo hua naraaz

sajae rahta tha honTon pe chahaton ke gulab

bichhaD rahe ho to wada karo mere hamdam

kabhi jo guzro idhar se to bhul mat jaana

yahin milenge kisi mulsari ke peD tale

karenge baaten shrangar-ras ke dohon ki

karenge baaten bihaari ki naykaon ki

karenge baaten kisi ke rasile honTon ki

mahakti zulfon ki kajal ki us ki bindiya ki

lachakti shaKH se jismon ki

chand-chehron ki

bichhaD rahe ho to wada karo

ki aaoge

kabhi jo guzro idhar se to bhul mat jaana

tumhaare hijr ke mausam ki sabz chadar ko

main apne tan pe sajae

yahin milunga tumhein