zindagi

tā-ba-hadd-e-nazar ek sunsān tanhā galī

jis ke uupar ḳhalāoñ kī sūrat

siyah nīlgūñ shāmiyāne laTakte hue

jin se Tāñkī huī muntashir zard sham'oñ kī tartīb se

chand mub.ham se kalmāt likkhe hue

zindagī pā-shikasta tamannāoñ ke zaḳhmī jismoñ se lipTī huī

zindagī ġham ke bahte añdheroñ meñ Duubī huī

in 'ufuq tā-ufuq vus'atoñ kī ghuTan meñ sisaktī huī

zindagī ek sunsān tanhā galī

jaise kam-‘umr hāthoñ se phislā huā faisla ho koī

muntashir sard be-sāḳhta tiira sangīñ amiT

maiñ akelā akelā yahāñ

aur 'ufuq tā-ufuq tīra-o-tār vīrāniyāñ

apnī tārīkiyoñ ke fusūñ meñ sulagtī huī sabz āñkheñ

mire kapkapāte sukūñ ke badan par jamā.e hue

pā-shikasta tamannāoñ ke reshmī ḳhuuñ meñ lithḌe hue vāhime

dhīre dhīre mirī samt baḌhte hue

ik qadam do qadam

tā-ba-hadd-e-nazar az-ufuq tā-ufuq

ḳhāmushī kā dhuāñ

āsmāñ-bos dīvāroñ ke paaoñ paḌtā huā

be-zabāñ pā-shikasta tamannāoñ ke haath aflāk kī samt uTThe hue

aur uupar bahut duur uupar kahīñ muskurātā huā

sard tārīk sangīñ amiT faisla

dard-nā-āshnā nanhe anjān hāthoñ se phislā huā

ta-ba-hadd-e-nazar ek sunsan tanha gali

jis ke upar KHalaon ki surat

siyah nilgun shamiyane laTakte hue

jin se Tanki hui muntashir zard sham'on ki tartib se

chand mubham se kalmat likkhe hue

zindagi pa-shikasta tamannaon ke zaKHmi jismon se lipTi hui

zindagi gham ke bahte andheron mein Dubi hui

in 'ufuq ta-ufuq wus'aton ki ghuTan mein sisakti hui

zindagi ek sunsan tanha gali

jaise kam-‘umr hathon se phisla hua faisla ho koi

muntashir sard be-saKHta tera sangin amiT

main akela akela yahan

aur 'ufuq ta-ufuq tira-o-tar viraniyan

apni tarikiyon ke fusun mein sulagti hui sabz aankhen

mere kapkapate sukun ke badan par jamae hue

pa-shikasta tamannaon ke reshmi KHun mein lithDe hue wahime

dhire dhire meri samt baDhte hue

ek qadam do qadam

ta-ba-hadd-e-nazar az-ufuq ta-ufuq

KHamushi ka dhuan

aasman-bos diwaron ke paon paDta hua

be-zaban pa-shikasta tamannaon ke hath aflak ki samt uTThe hue

aur upar bahut dur upar kahin muskuraata hua

sard tarik sangin amiT faisla

dard-na-ashna nanhe anjaan hathon se phisla hua