yaqin

maiñ vo ehsās huuñ

mausamoñ ke jilau meñ jo paltā rahā vaqt chaltā rahā

maiñ vahāñ bhī to thā

jis samay aadmī ko malā.ik ne sajda kiyā

lam-yazal ne jab iblīs ko be-niyāzī se rāñda kiyā

maiñ kabhī ḳhuld meñ aadmī aur malā.ik kī tasbīh thā

phir ise āb-o-gil kī hisoñ se navāzā gayā

ḳhaak se sarfarāza gayā

is ke chehre se jannat kā ġhāza gayā

maiñ vo tanvīr huuñ

jis ne tannūr se uThte tūfāñ kī lahroñ ko bojhal kiyā

shaam kī sarzamīñ ko qaran-hā-qaran de ke paiġhambarī ban meñ jal-thal kiyā

maiñ barāhīm ke fikr-zāroñ meñ paltā rahā vaqt chaltā rahā

maiñ ne ibn-e-barāhīm ke hausle meñ jo jalva kiyā

us ko naf’-o-zarar se mubarrā kiyā

maiñ ki is.hāq-o-yā'qūb kā ham-navā har nabī ke tayaqqun meñ Dhaltā rahā

vaqt chaltā rahā

ādam-o-nūh se le ke yasrib meñ baste gaDariyoñ talak

ahl-e-suffa se duniyā ke dīgar 'ilāqoñ ke valiyoñ talak

merī pahchān kā nam zamān-o-makāñ ko badaltā rahā vaqt chaltā rahā

merī lau ne ujāle ka.ī nīlgūñ-rang bhī sang bhī

mujh se sīkhe zamānoñ ke rauñde hue

be-kasoñ ne salīqe bhī aur Dhang bhī

mere dam se mohazzab hue nang bhī

merī barkat se duniyā pe aatā huā qahr Taltā rahā vaqt chaltā rahā

sab rishī saare jogī sabhī sant mere tamannā.ī haiñ

sab gurū aur chele rabbī church ke pādrī mere shaidā.ī haiñ

deviyoñ devtāoñ ke mandir bhī merī mohabbat se ḳhālī nahīñ

kaun sā shaḳhs hogā ki jis ne mirī aarzū dil meñ paalī nahīñ

maiñ buland aur baalā 'ibādat-gahoñ maqbaroñ mandiroñ gurū-dvāroñ

ke bām-o-dar-o-sehn meñ phūltā aur phaltā rahā

vaqt chaltā rahā

mujh ko jo pā gayā āyat-e-lā-taḳhāfū hai us ke liye

jis kā maiñ ho gayā husn-e-tabshīr-e-qūmū hai us ke liye

jis se maiñ duur ho jā.ūñgā

maiñ jahāñ paaoñ dhar duuñ vahāñ shāntī

par anā merā jauhar nahīñ jāntī

kaash duniyā mirā vasf pahchāntī

main wo ehsas hun

mausamon ke jilau mein jo palta raha waqt chalta raha

main wahan bhi to tha

jis samay aadmi ko malaik ne sajda kiya

lam-yazal ne jab iblis ko be-niyazi se randa kiya

main kabhi KHuld mein aadmi aur malaik ki tasbih tha

phir ise aab-o-gil ki hison se nawaza gaya

KHak se sarfaraaza gaya

is ke chehre se jannat ka ghaza gaya

main wo tanwir hun

jis ne tannur se uThte tufan ki lahron ko bojhal kiya

sham ki sarzamin ko qaran-ha-qaran de ke paighambari ban mein jal-thal kiya

main barahim ke fikr-zaron mein palta raha waqt chalta raha

main ne ibn-e-barahim ke hausle mein jo jalwa kiya

us ko naf’-o-zarar se mubarra kiya

main ki ishaq-o-ya'qub ka ham-nawa har nabi ke tayaqqun mein Dhalta raha

waqt chalta raha

aadam-o-nuh se le ke yasrib mein baste gaDariyon talak

ahl-e-suffa se duniya ke digar 'ilaqon ke waliyon talak

meri pahchan ka nam zaman-o-makan ko badalta raha waqt chalta raha

meri lau ne ujale kai nilgun-rang bhi sang bhi

mujh se sikhe zamanon ke raunde hue

be-kason ne saliqe bhi aur Dhang bhi

mere dam se mohazzab hue nang bhi

meri barkat se duniya pe aata hua qahr Talta raha waqt chalta raha

sab rishi sare jogi sabhi sant mere tamannai hain

sab guru aur chele rabbi church ke padri mere shaidai hain

dewiyon dewtaon ke mandir bhi meri mohabbat se KHali nahin

kaun sa shaKHs hoga ki jis ne meri aarzu dil mein pali nahin

main buland aur baala 'ibaadat-gahon maqbaron mandiron guru-dwaron

ke baam-o-dar-o-sehn mein phulta aur phalta raha

waqt chalta raha

mujh ko jo pa gaya aayat-e-la-taKHafu hai us ke liye

jis ka main ho gaya husn-e-tabshir-e-qumu hai us ke liye

jis se main dur ho jaunga

main jahan paon dhar dun wahan shanti

par ana mera jauhar nahin jaanti

kash duniya mera wasf pahchanti