KHud-kushi ki ek KHabar paDh kar

zindagī talḳhiyoñ se bharā ek zindāñ sahī

maut se to bahar-hāl behtar hī hai

maut meñ kyā dharā hai bhalā

ek be-rang sī ḳhāmushī ke sivā

zindagī rang hai

har ghaḌī ik na.e se nayā us kā āhang hai

zindagī yās-parvar umīdoñ ke saa.e tale

nit na.e tajraboñ kī panah-gāh hai

Dhalte saa.e hoñ yā phailtī dhuup ho

āsmāñ se barastī huī bārishoñ

ḳhushbuoñ meñ base phuul par to kisī kā ijāra nahīñ

sub.h ko chahchahāte parinde kahīñ

aur zartār jaisī sunahrī kiran

shaam kā sahar-gūñ jhuTpuTā

raat kī rāz-dārī meñ Duubī huī tīrgī

zindagī kī vo arzāñ 'ināyāt haiñ

jo ki an-mol haiñ

zindagi talKHiyon se bhara ek zindan sahi

maut se to bahar-haal behtar hi hai

maut mein kya dhara hai bhala

ek be-rang si KHamushi ke siwa

zindagi rang hai

har ghaDi ek nae se naya us ka aahang hai

zindagi yas-parwar umidon ke sae tale

nit nae tajrabon ki panah-gah hai

Dhalte sae hon ya phailti dhup ho

aasman se barasti hui barishon

KHushbuon mein base phul par to kisi ka ijara nahin

subh ko chahchahate parinde kahin

aur zartar jaisi sunahri kiran

sham ka sahar-gun jhuTpuTa

raat ki raaz-dari mein Dubi hui tirgi

zindagi ki wo arzan 'inayat hain

jo ki an-mol hain