hamara ganw hamare bachche

hamārā gaañv jo ūñche Tiile pe kal khaḌā thā

vo jis kī tārīḳh meñ likhā hai ki vo hamesha

guzarne vaale har ek sailāb par hañsā hai

har ek tūfān se laḌā hai

hamāre gaañv ke jitne baasī the

sab ke sab muskurā rahe the

hamāre bachche

guzarte sailāb meñ utar kar

batoñ kī sūrat nahā rahe the

hamāre gaañv ke sab buzurgoñ kā faisla thā

hamārā gaañv buland-tar hai

hameñ tabāhī kā kaisā Dar hai

magar ye shab jo guzar chukī hai

us ek shab meñ

hamāre gaañv meñ jis qadar bhī

charāġh raushan the bujh gaye haiñ

ki biphre paanī kī tund lahreñ

use bhī tārāj kar ke aage guzar ga.ī haiñ

hamāre bachche magar abhī tak

batoñ kī sūrat

biphartī maujoñ se khelte haiñ

hamara ganw jo unche Tile pe kal khaDa tha

wo jis ki tariKH mein likha hai ki wo hamesha

guzarne wale har ek sailab par hansa hai

har ek tufan se laDa hai

hamare ganw ke jitne basi the

sab ke sab muskura rahe the

hamare bachche

guzarte sailab mein utar kar

baton ki surat naha rahe the

hamare ganw ke sab buzurgon ka faisla tha

hamara ganw buland-tar hai

hamein tabahi ka kaisa Dar hai

magar ye shab jo guzar chuki hai

us ek shab mein

hamare ganw mein jis qadar bhi

charagh raushan the bujh gaye hain

ki biphre pani ki tund lahren

use bhi taraj kar ke aage guzar gai hain

hamare bachche magar abhi tak

baton ki surat

bipharti maujon se khelte hain