dastak

vājiba tū ne mirī fikr pe dastak de kar

mujh pe be-ant jazīroñ kī tamannā kholī

tū vo ehsās ki rag rag meñ utāre ḳhushbū

tū vo ummīd ki chehre pe ujālā kar de

tū vo mausam hai ki sahrāoñ meñ laa.e sabza

tū vo sarsar jo ajal baḳht ko achchhā kar de

tū vo sapnā hai jo āñkhoñ ko dhanak-zār kare

tū vo sūrat hai jo ehsās ko zinda kar de

tū vo jhoñkā ki harā kar de mohabbat kā vujūd

tū vo jauhar hai jo qatre ko bhī dariyā kar de

tū hai ummīd ke saa.e meñ chamaktā huā ḳhvāb

jin nigāhoñ meñ samā.e unheñ ḳhīra kar de

maiñ koī sūkhā huā peḌ thā naumīdī kā

vājiba! tū ne marī zaat ko sarsabz kiyā

wajiba tu ne meri fikr pe dastak de kar

mujh pe be-ant jaziron ki tamanna kholi

tu wo ehsas ki rag rag mein utare KHushbu

tu wo ummid ki chehre pe ujala kar de

tu wo mausam hai ki sahraon mein lae sabza

tu wo sarsar jo ajal baKHt ko achchha kar de

tu wo sapna hai jo aankhon ko dhanak-zar kare

tu wo surat hai jo ehsas ko zinda kar de

tu wo jhonka ki hara kar de mohabbat ka wujud

tu wo jauhar hai jo qatre ko bhi dariya kar de

tu hai ummid ke sae mein chamakta hua KHwab

jin nigahon mein samae unhen KHira kar de

main koi sukha hua peD tha naumidi ka

wajiba! tu ne mari zat ko sarsabz kiya