guzre zamane ki yaad

aksar shab-e-tanhā.ī meñ

kuchh der pahle niiñd se

guzrī huī dilchaspiyāñ

biite hue din 'aish ke

bante haiñ sham'-e-zindagī

aur Dālte haiñ raushnī

mere dil-e-sad-chāk par

vo bachpan aur vo sādgī

vo ronā vo hañsnā kabhī

phir vo javānī ke maze

vo dil-lagī vo qahqahe

vo 'ishq vo 'ahd-e-vafā

vo vā'da aur vo shukriya

vo lazzat-e-bazm-e-tarab

yaad aate haiñ ek ek sab

dil kā kañval jo roz-o-shab

rahtā shagufta thā so ab

us kā ye abtar haal hai

ik sabza-e-pāmāl hai

ik phuul kumhlāyā huā

TuuTā huā bikhrā huā

rauñdā paḌā hai ḳhaak par

yuuñ hī shab-e-tanhā.ī meñ

kuchh der pahle niiñd se

guzrī huī nākāmiyāñ

biite hue din ranj ke

bante haiñ sham'-e-be-kasī

aur Dālte haiñ raushnī

un hasratoñ kī qabr par

jo ārzūeñ pahle thiiñ

phir ġham se hasrat ban ga.iiñ

ġham dostoñ kī faut kā

un kī javānā maut kā

haañ dekh shīshe meñ mire

un hasratoñ kā ḳhuun hai

jo gardish-e-ayyām se

jo qismat-e-nākām se

yā ‘aish-e-ġham-anjām se

marg-e-but-e-gulfām se

ḳhud mere ġham meñ mar ga.iiñ

kis tarh pā.ūñ maiñ hazīñ

qaabū dil-e-be-sabr par

jab aah un ahbāb ko

maiñ yaad kar uThtā huuñ jo

yuuñ mujh se pahle uTh gaye

jas tarh taa.ir baaġh ke

yā jaise phuul aur pattiyāñ

gir jaa.eñ sab qabl az-ḳhizāñ

aur ḳhushk rah jaa.e shajar

us vaqt tanhā.ī mirī

ban kar mujassam be-kasī

kar detī hai pesh-e-nazar

hū-haq sā ik vīrān ghar

vīrān jis ko chhoḌ kar

sab rahne vaale chal base

TuuTe kivāḌ aur khiḌkiyāñ

chhat ke Tapakne ke nishāñ

parnāle haiñ rauzan nahīñ

ye hall hai āñgan nahīñ

parde nahīñ chilman nahīñ

ik sham' tak raushan nahīñ

mere sivā jis meñ koī

jhāñke na bhūle se kabhī

vo ḳhāna-e-ḳhālī hai dil

pūchhe na jis ko dev bhī

ujḌā huā vīrān ghar

yuuñ hī shab-e-tanhā.ī meñ

kuchh der pahle niiñd se

guzrī huiiñ dilchaspiyāñ

biite hue din 'aish ke

bante haiñ sham'-e-zindagī

aur Dālte haiñ raushnī

mere dil-e-sad-chāk par

aksar shab-e-tanhai mein

kuchh der pahle nind se

guzri hui dilchaspiyan

bite hue din 'aish ke

bante hain sham'-e-zindagi

aur Dalte hain raushni

mere dil-e-sad-chaak par

wo bachpan aur wo sadgi

wo rona wo hansna kabhi

phir wo jawani ke maze

wo dil-lagi wo qahqahe

wo 'ishq wo 'ahd-e-wafa

wo wa'da aur wo shukriya

wo lazzat-e-bazm-e-tarab

yaad aate hain ek ek sab

dil ka kanwal jo roz-o-shab

rahta shagufta tha so ab

us ka ye abtar haal hai

ek sabza-e-pamal hai

ek phul kumhlaya hua

TuTa hua bikhra hua

raunda paDa hai KHak par

yun hi shab-e-tanhai mein

kuchh der pahle nind se

guzri hui nakaamiyan

bite hue din ranj ke

bante hain sham'-e-be-kasi

aur Dalte hain raushni

un hasraton ki qabr par

jo aarzuen pahle thin

phir gham se hasrat ban gain

gham doston ki faut ka

un ki jawana maut ka

han dekh shishe mein mere

un hasraton ka KHun hai

jo gardish-e-ayyam se

jo qismat-e-nakaam se

ya ‘aish-e-gham-anjam se

marg-e-but-e-gulfam se

KHud mere gham mein mar gain

kis tarh paun main hazin

qabu dil-e-be-sabr par

jab aah un ahbab ko

main yaad kar uThta hun jo

yun mujh se pahle uTh gaye

jas tarh tair bagh ke

ya jaise phul aur pattiyan

gir jaen sab qabl az-KHizan

aur KHushk rah jae shajar

us waqt tanhai meri

ban kar mujassam be-kasi

kar deti hai pesh-e-nazar

hu-haq sa ek viran ghar

viran jis ko chhoD kar

sab rahne wale chal base

TuTe kiwaD aur khiDkiyan

chhat ke Tapakne ke nishan

parnale hain rauzan nahin

ye hall hai aangan nahin

parde nahin chilman nahin

ek sham' tak raushan nahin

mere siwa jis mein koi

jhanke na bhule se kabhi

wo KHana-e-KHali hai dil

puchhe na jis ko dew bhi

ujDa hua viran ghar

yun hi shab-e-tanhai mein

kuchh der pahle nind se

guzri huin dilchaspiyan

bite hue din 'aish ke

bante hain sham'-e-zindagi

aur Dalte hain raushni

mere dil-e-sad-chaak par