circus ka ghoDa

saped aur bhūrā badan kā chharerā

vo naT-khaT bachherā

ḳharīdā gayā gaañv ke ek mele meñ

laayā gayā hanTaroñ, chābukoñ kī pur-asrār duniyā meñ

sīkhe vo dil-chasp anmol kartab

uḌe phailte chīḳhte dā.eroñ meñ

phalāñge sulagtī bhayānak tikoneñ

uThā ke chale piiTh par raqs karte hue bandaroñ ko

ishāroñ kī āvāz sun kar vo lapke hañse hinhinā.e

tamāshā.iyoñ ko lubhā.e rijhā.e

vo circus kā ghoḌā

pareshān shahroñ meñ kartab dikhātā

tamāshā.iyoñ ke diloñ ko lubhātā

tahayyur hañsī qahqahoñ tāliyoñ kī fazāoñ meñ barsoñ chhalāñgeñ lagātā

usī gaañv ke ek mele meñ pohñchā

ḳharīdā gayā thā jahāñ se vo bachpan meñ lekin vahāñ ab

vahāñ kaun thā us ko pahchānñe vaalā koī nahīñ thā

saped aur bhura badan ka chharera

wo naT-khaT bachhera

KHarida gaya ganw ke ek mele mein

laya gaya hanTaron, chabukon ki pur-asrar duniya mein

sikhe wo dil-chasp anmol kartab

uDe phailte chiKHte daeron mein

phalange sulagti bhayanak tikonen

uTha ke chale piTh par raqs karte hue bandaron ko

ishaaron ki aawaz sun kar wo lapke hanse hinhinae

tamashaiyon ko lubhae rijhae

wo circus ka ghoDa

pareshan shahron mein kartab dikhata

tamashaiyon ke dilon ko lubhata

tahayyur hansi qahqahon taliyon ki fazaon mein barson chhalangen lagata

usi ganw ke ek mele mein pohncha

KHarida gaya tha jahan se wo bachpan mein lekin wahan ab

wahan kaun tha us ko pahchanne wala koi nahin tha