ai wali-o-rabb-e-kaun-o-makan

Duub ga.ī ḳhāmoshī meñ maġhrib kī azaañ

kaisā sukūt hai vālī-o-rabb-e-kaun-o-makāñ

alhamdulillāhe-rabb-il-'ālamīn

sab tā'rīf ḳhudā kī jo hai bahut 'azīm

bārish se nikhrā nikhrā shaffāf falak

niilā niilā hadd-e-nazar tak phailā hai

sabze kī maḳhmal se Dhakī hai narm zamīn

alhamdulillāhe-rabb-il-'ālamīn

sab tā'rīf ḳhudā kī jo hai bahut 'azīm

kaisī soch ne mere dil meñ chuTkī lī

kaise dhyān se merī āñkheñ bhar aa.iiñ

siine meñ kyuuñ sannāTā sā chhāyā hai

ye mere sajde meñ tazabzub kaisā hai

lab par du'ā.eñ aa ke banīñ kyuuñ be-mā'nī

jaise merā andar ho sunsān ujaaḌ

koī to aa.e koī to aa kar dastak de

kaise kholūñ apne dil ke band kivāḌ

Dub gai KHamoshi mein maghrib ki azan

kaisa sukut hai wali-o-rabb-e-kaun-o-makan

alhamdulillahe-rabb-il-'alamin

sab ta'rif KHuda ki jo hai bahut 'azim

barish se nikhra nikhra shaffaf falak

nila nila hadd-e-nazar tak phaila hai

sabze ki maKHmal se Dhaki hai narm zamin

alhamdulillahe-rabb-il-'alamin

sab ta'rif KHuda ki jo hai bahut 'azim

kaisi soch ne mere dil mein chuTki li

kaise dhyan se meri aankhen bhar aain

sine mein kyun sannaTa sa chhaya hai

ye mere sajde mein tazabzub kaisa hai

lab par du'aen aa ke banin kyun be-ma'ni

jaise mera andar ho sunsan ujaD

koi to aae koi to aa kar dastak de

kaise kholun apne dil ke band kiwaD