bad-gumani

tum ne hameñ apnī manzil kā nishān batāyā

ham ne apnī miTTī ek bhaTTī ke havāle kar dī

aur īñToñ se tumhārā rāsta hamvār kiyā

tum ne hameñ apnī hameshgī kā qissa sunāyā

ham ne davām naamī ik dāstān likhī

aur us kā iqtibās tumhāre naam kar diyā

tum ne fāteh banñe kī ḳhvāhish kā iz.hār kiyā

ham ne shash-jihāt ke māthoñ par maftūh likhā

aur tumhārī dīvār ke saa.e meñ lā kar rakh diyā

tum ne shā'irī se apne lagāv kā tazkira kiyā

ham ne guzishtagāñ aur ā.indagāñ ke sab dīvān jalā Daale

aur un kī raakh se tumhāre liye siyāhī ḳhalq kī

tum ne hameñ mutavajjah karne kī ḳhātir ek ishāra kiyā

ham ne apnī āñkheñ na.e sire se raushan kiiñ

aur tumhāre chehre kī nigarānī par mā'mūr kar diiñ

tab ham ne pahlī baar tumhārī āñkhoñ meñ jhāñk kar dekhā

aur un meñ jaltī aag kī tapish se

hamāre kaleje tāñbe kī tarah pighalne lage

tum ne ham se kam hone kā kahā

ham bahut kam ho ga.e

tum ne ham se mazīd kam hone kā kahā

ham sifar ho ga.e

tum hamārī ġhair-maujūdgī par nārāz hue

aur kamre ke darvāze ko Thokar maar kar

apne kaa.ī lage ġhaar kī jānib palaT ga.e

tum ne hamein apni manzil ka nishan bataya

hum ne apni miTTi ek bhaTTi ke hawale kar di

aur inTon se tumhaara rasta hamwar kiya

tum ne hamein apni hameshgi ka qissa sunaya

hum ne dawam nami ek dastan likhi

aur us ka iqtibas tumhaare nam kar diya

tum ne fateh banne ki KHwahish ka izhaar kiya

hum ne shash-jihat ke mathon par maftuh likha

aur tumhaari diwar ke sae mein la kar rakh diya

tum ne sha'iri se apne lagaw ka tazkira kiya

hum ne guzishtagan aur aaindagan ke sab diwan jala Dale

aur un ki rakh se tumhaare liye siyahi KHalq ki

tum ne hamein mutawajjah karne ki KHatir ek ishaara kiya

hum ne apni aankhen nae sire se raushan kin

aur tumhaare chehre ki nigarani par ma'mur kar din

tab hum ne pahli bar tumhaari aankhon mein jhank kar dekha

aur un mein jalti aag ki tapish se

hamare kaleje tanbe ki tarah pighalne lage

tum ne hum se kam hone ka kaha

hum bahut kam ho gae

tum ne hum se mazid kam hone ka kaha

hum sifar ho gae

tum hamari ghair-maujudgi par naraaz hue

aur kamre ke darwaze ko Thokar mar kar

apne kai lage ghaar ki jaanib palaT gae