main pal do pal ka shair hun

maiñ pal do pal kā shā'ir huuñ pal do pal mirī kahānī hai

pal do pal merī hastī hai pal do pal mirī javānī hai

mujh se pahle kitne shā'ir aa.e aur aa kar chale ga.e

kuchh aaheñ bhar kar lauT ga.e kuchh naġhme gā kar chale ga.e

vo bhī ik pal kā qissa the maiñ bhī ik pal kā qissa huuñ

kal tum se judā ho jā.ūñgā go aaj tumhārā hissa huuñ

pal do pal meñ kuchh kah paayā itnī hī sa'ādat kaafī hai

pal do pal tum ne mujh ko sunā itnī hī ‘ināyat kaafī hai

kal aur ā.eñge naġhmoñ kī khiltī kaliyāñ chunñe vaale

mujh se behtar kahne vaale tum se behtar sunñe vaale

har nasl ik fasl hai dhartī kī aaj ugtī hai kal kaTtī hai

jīvan vo mahñgī madirā hai jo qatra qatra baTtī hai

sāgar se ubhrī lahar huuñ maiñ sāgar meñ phir kho jā.ūñgā

miTTī kī ruuh kā sapnā huuñ miTTī meñ phir so jā.ūñgā

kal koī mujh ko yaad kare kyuuñ koī mujh ko yaad kare

masrūf zamāna mere liye kyuuñ vaqt apnā barbād kare

main pal do pal ka sha'ir hun pal do pal meri kahani hai

pal do pal meri hasti hai pal do pal meri jawani hai

mujh se pahle kitne sha'ir aae aur aa kar chale gae

kuchh aahen bhar kar lauT gae kuchh naghme ga kar chale gae

wo bhi ek pal ka qissa the main bhi ek pal ka qissa hun

kal tum se juda ho jaunga go aaj tumhaara hissa hun

pal do pal mein kuchh kah paya itni hi sa'adat kafi hai

pal do pal tum ne mujh ko suna itni hi ‘inayat kafi hai

kal aur aaenge naghmon ki khilti kaliyan chunne wale

mujh se behtar kahne wale tum se behtar sunne wale

har nasl ek fasl hai dharti ki aaj ugti hai kal kaTti hai

jiwan wo mahngi madira hai jo qatra qatra baTti hai

sagar se ubhri lahar hun main sagar mein phir kho jaunga

miTTi ki ruh ka sapna hun miTTi mein phir so jaunga

kal koi mujh ko yaad kare kyun koi mujh ko yaad kare

masruf zamana mere liye kyun waqt apna barbaad kare