kashmir

paanī meñ hai chashmoñ ke asar āb-e-baqā kā

har naḳhl pe 'ālam ḳhizar-e-sabz-qabā kā

jo phuul hai gulshan meñ vo hai nuur ḳhudā kā

saa.e meñ shajar ke hai asar zill-e-humā kā

mabdā karam-e-'ām kī har jū-e-ravāñ hai

sar-chashma-e-faiz-e-chaman-ārā-e-jahāñ hai

vo mauj-e-havā kā harakat abr ko denā

chashmoñ se pahāḌoñ ke vo uḌtā huā phena

gaate hue mallāhoñ kā vo kashtiyāñ khenā

dil kā vo sar-e-shām idhar karvaTeñ lenā

vo 'aks charāġhoñ kā jhalaktā nazar aanā

paanī kā sitāra bhī chamaktā nazar aanā

har lāla-e-kuhsār hai shakl-e-gul-e-rāhat

daaġh us ke haiñ yā ḳhāl-e-ruḳh-e-hūr-e-masarrat

kyā sabza-e-ḳhush-rang hai sarmāya-e-'ishrat

dil ke liye ThanDak hai jigar ke liye farhat

aisā nahīñ qudrat ne kiyā farsh kahīñ par

is rang kā sabza hī nahīñ rū-e-zamīñ par

vo sub.h ko kohsār ke phūloñ kā mahaknā

vo jhāḌiyoñ kī aaḌ meñ chiḌiyoñ kā chahaknā

gardūñ pe shafaq koh pe laale kā lahaknā

mastoñ kī tarah abr ke TukḌoñ kā bahaknā

har phuul kī jumbish se 'ayāñ naaz parī kā

chalnā vo dabe paañv nasīm-e-saharī kā

vo tā.ir-e-kohsār lab-e-chashma-e-kohsār

vo sard havā vo karam-e-abr-e-guhar-bār

vo meva-e-ḳhush-rang vo sarsabz chaman-zār

ik aan meñ sehat ho jo barsoñ kā ho bīmār

ye bāġh-e-vatan rū-kash-e-gulzār-e-jināñ hai

sarmāya-e-nāz-e-chaman-ārā-e-jahāñ hai

hai ḳhitta-e-sar-sabz meñ ik nuur kā 'ālam

har shāḳh-o-shajar par shajar-e-tūr kā 'ālam

parvīn hai ye ḳhosha-e-angūr kā 'ālam

har ḳhaar pe bhī hai miza-e-hūr kā 'ālam

nikle na sadā aisī muġhannī ke gulū se

aatī hai jo āvāz-e-tarannum lab-e-jū se

mevoñ se girāñ-bār vo ashjār ke Daale

bikhre hue vo dāman-e-kohsār pe laale

uḌte hue bālā-e-havā barf ke jhāle

dekhe jo koī duur se haiñ ruī ke gaale

vo abr ke lakkoñ kā tamāshā shajaroñ meñ

jharnoñ kī sadā.eñ vo pahāḌoñ ke daroñ meñ

chhūTe hue us baaġh ko guzrā hai zamāna

taaza hai magar us kī mohabbat kā fasāna

'ālam ne sharaf jin kī buzurgī kā hai maanā

uThte the usī ḳhaak se vo 'ālim-o-dānā

tan jin kā hai paivand ab us paak zamīñ kā

rag rag meñ hamārī hai ravāñ ḳhuuñ unhīñ kā

haañ maiñ bhī huuñ bulbul usī shādāb chaman kā

hai chashma-e-firdaus ye 'ālam hai dahan kā

kis tarh na sarsabz ho gulzār suḳhan kā

hai rang tabī'at meñ chaman-zār-e-vatan kā

taaze haiñ mazāmīñ bhī tabī'at bhī harī hai

haañ gulshan-e-qaumī kī havā sar meñ bharī hai

pani mein hai chashmon ke asar aab-e-baqa ka

har naKHl pe 'alam KHizar-e-sabz-qaba ka

jo phul hai gulshan mein wo hai nur KHuda ka

sae mein shajar ke hai asar zill-e-huma ka

mabda karam-e-'am ki har ju-e-rawan hai

sar-chashma-e-faiz-e-chaman-ara-e-jahan hai

wo mauj-e-hawa ka harakat abr ko dena

chashmon se pahaDon ke wo uDta hua phena

gate hue mallahon ka wo kashtiyan khena

dil ka wo sar-e-sham idhar karwaTen lena

wo 'aks charaghon ka jhalakta nazar aana

pani ka sitara bhi chamakta nazar aana

har lala-e-kuhsar hai shakl-e-gul-e-rahat

dagh us ke hain ya KHal-e-ruKH-e-hur-e-masarrat

kya sabza-e-KHush-rang hai sarmaya-e-'ishrat

dil ke liye ThanDak hai jigar ke liye farhat

aisa nahin qudrat ne kiya farsh kahin par

is rang ka sabza hi nahin ru-e-zamin par

wo subh ko kohsar ke phulon ka mahakna

wo jhaDiyon ki aaD mein chiDiyon ka chahakna

gardun pe shafaq koh pe lale ka lahakna

maston ki tarah abr ke TukDon ka bahakna

har phul ki jumbish se 'ayan naz pari ka

chalna wo dabe panw nasim-e-sahari ka

wo tair-e-kohsar lab-e-chashma-e-kohsar

wo sard hawa wo karam-e-abr-e-guhar-bar

wo mewa-e-KHush-rang wo sarsabz chaman-zar

ek aan mein sehat ho jo barson ka ho bimar

ye bagh-e-watan ru-kash-e-gulzar-e-jinan hai

sarmaya-e-naz-e-chaman-ara-e-jahan hai

hai KHitta-e-sar-sabz mein ek nur ka 'alam

har shaKH-o-shajar par shajar-e-tur ka 'alam

parwin hai ye KHosha-e-angur ka 'alam

har KHar pe bhi hai miza-e-hur ka 'alam

nikle na sada aisi mughanni ke gulu se

aati hai jo aawaz-e-tarannum lab-e-ju se

mewon se giran-bar wo ashjar ke Dale

bikhre hue wo daman-e-kohsar pe lale

uDte hue baala-e-hawa barf ke jhaale

dekhe jo koi dur se hain rui ke gale

wo abr ke lakkon ka tamasha shajaron mein

jharnon ki sadaen wo pahaDon ke daron mein

chhuTe hue us bagh ko guzra hai zamana

taza hai magar us ki mohabbat ka fasana

'alam ne sharaf jin ki buzurgi ka hai mana

uThte the usi KHak se wo 'alim-o-dana

tan jin ka hai paiwand ab us pak zamin ka

rag rag mein hamari hai rawan KHun unhin ka

han main bhi hun bulbul usi shadab chaman ka

hai chashma-e-firdaus ye 'alam hai dahan ka

kis tarh na sarsabz ho gulzar suKHan ka

hai rang tabi'at mein chaman-zar-e-watan ka

taze hain mazamin bhi tabi'at bhi hari hai

han gulshan-e-qaumi ki hawa sar mein bhari hai