inkishaf

sar-e-bazm kal mujhe dekh kar

vo isī ḳhayāl se Dar ga.ī

ki maiñ us kī or havāoñ meñ

kahīñ apnā bosa uḌā na duuñ

vo simaT ke aur sañvar ga.ī

kuchh ajiib ḳhauf sā dil meñ thā

mujhe dekh kar vo palaT ga.ī

na to bhuul hai na to yaad hai

ye supurdagī kā tazād hai

vo khaḌe khaḌe jaise so ga.ī

vo tasavvurāt meñ kho ga.ī

vo tasavvurāt bhī ḳhuub the

maiñ daraḳht ban ke khaḌā rahā

to vo bel ban ke lipaT ga.ī

maiñ taras rahā thā sugandh ko

to vo shāḳh-e-gul sī lachak ga.ī

mirā jhūT-mūT kā nashsha thā

mujhe dekh kar vo bahak ga.ī

bas isī kā us ko malāl thā

ki vo ḳhvāb thā na ḳhayāl thā

phir achānak aa ke qarīb hī

kiyā jab kisī ne savāl to

vo jo soch thī vo bikhar ga.ī

maiñ samajh rahā thā ki ḳhush hai vo

magar us ko dekh ke yuuñ lagā

ki ye sochnā mirī bhuul thī

mujhe dekh kar vo malūl thī

sar-e-bazm kal mujhe dekh kar

wo isi KHayal se Dar gai

ki main us ki or hawaon mein

kahin apna bosa uDa na dun

wo simaT ke aur sanwar gai

kuchh ajib KHauf sa dil mein tha

mujhe dekh kar wo palaT gai

na to bhul hai na to yaad hai

ye supurdagi ka tazad hai

wo khaDe khaDe jaise so gai

wo tasawwuraat mein kho gai

wo tasawwuraat bhi KHub the

main daraKHt ban ke khaDa raha

to wo bel ban ke lipaT gai

main taras raha tha sugandh ko

to wo shaKH-e-gul si lachak gai

mera jhuT-muT ka nashsha tha

mujhe dekh kar wo bahak gai

bas isi ka us ko malal tha

ki wo KHwab tha na KHayal tha

phir achanak aa ke qarib hi

kiya jab kisi ne sawal to

wo jo soch thi wo bikhar gai

main samajh raha tha ki KHush hai wo

magar us ko dekh ke yun laga

ki ye sochna meri bhul thi

mujhe dekh kar wo malul thi