26 janwari
sarshāriyoñ kā baab hai chhabbīs janvarī
bhārat kī āb-o-tāb hai chhabbīs janvarī
jis kī kiran kiran meñ taraqqī kā nuur hai
ik aisā āftāb hai chhabbīs janvarī
surḳhī milī hai jis ko shahīdoñ ke ḳhuun se
dekho vahī gulāb hai chhabbīs janvarī
har aadmī ko detī hai tohfa nashāt kā
ḳhush-zā.eqa sharāb hai chhabbīs janvarī
haiñ jis kī lai pe raqs-kunāñ mulk ke 'avām
vo boltā rabāb hai chhabbīs janvarī
'īsā.ī hindū sikh-o-musalmāñ kā hai 'azīz
tehvār lā-javāb hai chhabbīs janvarī
har harf meñ nihāñ hai koī dāstāñ 'zafar'
ik boltī kitāb hai chhabbīs janvarī
sarshaariyon ka bab hai chhabbis janwari
bhaarat ki aab-o-tab hai chhabbis janwari
jis ki kiran kiran mein taraqqi ka nur hai
ek aisa aaftab hai chhabbis janwari
surKHi mili hai jis ko shahidon ke KHun se
dekho wahi gulab hai chhabbis janwari
har aadmi ko deti hai tohfa nashat ka
KHush-zaeqa sharab hai chhabbis janwari
hain jis ki lai pe raqs-kunan mulk ke 'awam
wo bolta rabab hai chhabbis janwari
'isai hindu sikh-o-musalman ka hai 'aziz
tehwar la-jawab hai chhabbis janwari
har harf mein nihan hai koi dastan 'zafar'
ek bolti kitab hai chhabbis janwari
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
