be-nishan

maiñ ab aayā huuñ itne barsoñ ke baa'd

āñdhiyāñ aa.iiñ badliyāñ barsīñ

dab ga.iiñ ḳhaak kī taheñ tah-e-ḳhāk

bahtī miTTī meñ bah ga.ī miTTī

mere nādīda pesh-rau tirī qabr

kis jagah thī ye ab kise mā'lūm

yūñhī apne qayās se maiñ ne

ret kī ik shikan ko pahchānā

miTtī sat.hoñ pe ek Dūbtī satr

ik ḳhat-e-ḳhāk jis pe kuchh kankar

maiñ ne pahle to chun ke rakh bhī diye

phir ḳhayāl aayā ab ye kaun kahe

qabr terī yahīñ kahīñ thī magar

thī kahāñ shāyad is jagah to na thī

kuchh jo sochā na jaane kyā sochā

zehn meñ laakh ulajh ga.e ḳhāke

maiñ ne kankar vo sab bikher diye

be-nishāñ ḳhaak mere sāmne ab

un jahānoñ kā ek hissa hai

jin ke bhedoñ kī thaah meñ tū hai

jin ke sāyoñ kī qabr meñ maiñ huuñ

main ab aaya hun itne barson ke ba'd

aandhiyan aain badliyan barsin

dab gain KHak ki tahen tah-e-KHak

bahti miTTi mein bah gai miTTi

mere nadida pesh-rau teri qabr

kis jagah thi ye ab kise ma'lum

yunhi apne qayas se main ne

ret ki ek shikan ko pahchana

miTti sathon pe ek Dubti satr

ek KHat-e-KHak jis pe kuchh kankar

main ne pahle to chun ke rakh bhi diye

phir KHayal aaya ab ye kaun kahe

qabr teri yahin kahin thi magar

thi kahan shayad is jagah to na thi

kuchh jo socha na jaane kya socha

zehn mein lakh ulajh gae KHake

main ne kankar wo sab bikher diye

be-nishan KHak mere samne ab

un jahanon ka ek hissa hai

jin ke bhedon ki thah mein tu hai

jin ke sayon ki qabr mein main hun