dil dushman

‘āqiloñ ne farmāyā

dil kī baat pāgal-pan

josh-e-shauq do ik din

husn-o-'ishq kam-māya

āb-o-gil kī duniyā meñ

sang jaise dil kar lo

ḳhvāb dekhne chhoḌo

phir bhī kyā kare koī

dil meñ huuk jab uTThe

ye sadā nikaltī hai

ek baar mil jaa.e

haath thaam le aa kar

sirf ek lamhe ko

kaisī hogī vo ThanDak

mere pyāse hāthoñ par

us ke lams kī shabnam

saarā dard dhul jaa.e

ye jo jaañ sulagtī hai

is ko chain aa jaa.e

dil ke zaḳhm kachche haiñ

dil sadā kā ziddī dil

phir bhī Thaan lete haiñ

‘āqiloñ kī māneñge

ye fuzūl sī bāteñ

ab kabhī na socheñge

dil bhī kaisā dushman hai

bas isī irāde se

dard ko dabāte haiñ

dil to phir bhī dukhtā hai

niiñd bhī nahīñ aatī

ban ga.ī jalan aisī

zindagī kī vīrānī

suunī suunī tanhā.ī

karvaTeñ badalte haiñ

‘āqiloñ ke kahne se

dard bhī dabā leñge

zaḳhm bhī chhupā leñge

hoñT bhīñch kar apne

rokte haiñ jab aañsū

aañkh meñ khaTakte haiñ

‘aqilon ne farmaya

dil ki baat pagal-pan

josh-e-shauq do ek din

husn-o-'ishq kam-maya

aab-o-gil ki duniya mein

sang jaise dil kar lo

KHwab dekhne chhoDo

phir bhi kya kare koi

dil mein huk jab uTThe

ye sada nikalti hai

ek bar mil jae

hath tham le aa kar

sirf ek lamhe ko

kaisi hogi wo ThanDak

mere pyase hathon par

us ke lams ki shabnam

sara dard dhul jae

ye jo jaan sulagti hai

is ko chain aa jae

dil ke zaKHm kachche hain

dil sada ka ziddi dil

phir bhi Than lete hain

‘aqilon ki manenge

ye fuzul si baaten

ab kabhi na sochenge

dil bhi kaisa dushman hai

bas isi irade se

dard ko dabaate hain

dil to phir bhi dukhta hai

nind bhi nahin aati

ban gai jalan aisi

zindagi ki virani

suni suni tanhai

karwaTen badalte hain

‘aqilon ke kahne se

dard bhi daba lenge

zaKHm bhi chhupa lenge

honT bhinch kar apne

rokte hain jab aansu

aankh mein khaTakte hain