chand nasihaten

kaaT lenā har kaThin manzil kā kuchh mushkil nahīñ

ik zarā insān meñ chalne kī himmat chāhiye

mil nahīñ saktī nikammoñ ko zamāne meñ murād

kāmyābī kī jo ḳhvāhish ho to mehnat chāhiye

ḳhaak mehnat ho sakegī ho na jab hāthoñ meñ zor

tandurustī ke liye varzish kī aadat chāhiye

ḳhush-mizājī sā zamāne meñ koī jaadū nahīñ

har koī tahsīñ kahe aisī tabī.at chāhiye

hañs ke milnā raam kar lenā har har insān ko

sab se mīThā bolne kī tum ko aadat chāhiye

ek hī allāh ke bande haiñ sab chhoTe baḌe

apne ham-jinsoñ se duniyā meñ mohabbat chāhiye

hai burā.ī hī burā.ī kaam kal par chhoḌnā

aaj sab kuchh kar ke uTho gar farāġhat chāhiye

jo buroñ ke paas baiThegā burā ho jā.egā

nek hone ke liye nekoñ kī sohbat chāhiye

saath vaale dekhnā tum se na baḌh jaa.eñ kahīñ

josh aisā chāhiye aisī hamiyyat chāhiye

hukmarāñ ho koī apnā ho yā begāna

dī ḳhudā ne jis ko izzat us kī izzat chāhiye

dekh kar chalnā kuchal jaa.e na chyūñTī raah meñ

aadmī ko be-zabānoñ se bhī ulfat chāhiye

hai isī meñ bhed izzat kā agar samjhe koī

chhoTe bachchoñ ko buzurgoñ kī itā.at chāhiye

ilm kahte haiñ jise sab se baḌī daulat hai ye

DhūñD lo is ko agar duniyā meñ izzat chāhiye

sab burā kahte haiñ laḌne ko burī aadat hai ye

saath ke laḌke jo hoñ un se rifāqat chāhiye

hoñ jamā.at meñ sharārat karne vaale bhī agar

duur kī un se faqat sāhab salāmat chāhiye

dekhnā aapas meñ phir nafrat na ho jaa.e kahīñ

is qadar had se ziyāda bhī na millat chāhiye

bāp-dādā kī baḌā.ī pe na itrānā kabhī

aadmī ko apne kāmoñ kī sharāfat chāhiye

gar kitābeñ ho ga.iiñ mailī to kyā paḌhne kā lutf

kaam kī chīzeñ haiñ jo un kī hifāzat chāhiye

kaT lena har kaThin manzil ka kuchh mushkil nahin

ek zara insan mein chalne ki himmat chahiye

mil nahin sakti nikammon ko zamane mein murad

kaamyabi ki jo KHwahish ho to mehnat chahiye

KHak mehnat ho sakegi ho na jab hathon mein zor

tandurusti ke liye warzish ki aadat chahiye

KHush-mizaji sa zamane mein koi jadu nahin

har koi tahsin kahe aisi tabiat chahiye

hans ke milna ram kar lena har har insan ko

sab se miTha bolne ki tum ko aadat chahiye

ek hi allah ke bande hain sab chhoTe baDe

apne ham-jinson se duniya mein mohabbat chahiye

hai burai hi burai kaam kal par chhoDna

aaj sab kuchh kar ke uTho gar faraghat chahiye

jo buron ke pas baiThega bura ho jaega

nek hone ke liye nekon ki sohbat chahiye

sath wale dekhna tum se na baDh jaen kahin

josh aisa chahiye aisi hamiyyat chahiye

hukmaran ho koi apna ho ya begana

di KHuda ne jis ko izzat us ki izzat chahiye

dekh kar chalna kuchal jae na chyunTi rah mein

aadmi ko be-zabanon se bhi ulfat chahiye

hai isi mein bhed izzat ka agar samjhe koi

chhoTe bachchon ko buzurgon ki itaat chahiye

ilm kahte hain jise sab se baDi daulat hai ye

DhunD lo is ko agar duniya mein izzat chahiye

sab bura kahte hain laDne ko buri aadat hai ye

sath ke laDke jo hon un se rifaqat chahiye

hon jamaat mein shararat karne wale bhi agar

dur ki un se faqat sahab salamat chahiye

dekhna aapas mein phir nafrat na ho jae kahin

is qadar had se ziyaada bhi na millat chahiye

bap-dada ki baDai pe na itrana kabhi

aadmi ko apne kaamon ki sharafat chahiye

gar kitaben ho gain maili to kya paDhne ka lutf

kaam ki chizen hain jo un ki hifazat chahiye