banaras

har ik ko bhātī hai dil se fazā banaras kī

vo ghaaT aur vo ThanDī havā banaras kī

vo mandiroñ meñ pujāriyoñ kā hujūm

vo ghanTiyoñ kī sadā vo fazā banaras kī

tamām hind meñ mash.hūr hai yahāñ kī sahar

kuchh is qadar hai sahar ḳhushnumā banaras kī

pujāriyoñ kā nahānā vo ghaaT par aa kar

vo sub.h-dam kī fazā dil-kushā banaras kī

vo kashtiyoñ kā samāñ aur vo sair gañgā kī

vo ThanDī ThanDī havā jāñ-fizā banaras kī

hamāre dil se nikaltī hai ye duā 'aḳhtar'

ki phir bhī shakl dikhā.e ḳhudā banaras kī

har ek ko bhati hai dil se faza banaras ki

wo ghaT aur wo ThanDi hawa banaras ki

wo mandiron mein pujariyon ka hujum

wo ghanTiyon ki sada wo faza banaras ki

tamam hind mein mashhur hai yahan ki sahar

kuchh is qadar hai sahar KHushnuma banaras ki

pujariyon ka nahana wo ghaT par aa kar

wo subh-dam ki faza dil-kusha banaras ki

wo kashtiyon ka saman aur wo sair ganga ki

wo ThanDi ThanDi hawa jaan-fiza banaras ki

hamare dil se nikalti hai ye dua 'aKHtar'

ki phir bhi shakl dikhae KHuda banaras ki