billu-barbar

are hero!

adākārī na kar chal uTh

ki lākhoñ dil tirī āñkhoñ se dhaḌkan lene aa.e haiñ

chalo maanā tirī āñkheñ kuchh aisī thiiñ

ki is be-kār sayyāre pe un kā der tak rahnā

na bantā thā

magar pyāre!

tripan saal to kuchh bhī nahīñ hote

to kyoñ ḳhāmosh hai kuchh kah

ki terī be-karāñ āvāz meñ to lākhoñ sadiyoñ kī sadā.eñ thiiñ

tire chehre kā har gahrā ta.assur aisā charḳha thā

ki jis par apne jazbe kāḌhte the ham

so is charḳhe kī kuuk ab kis liye chup hai

kahānī kā hidāyat-kār bhī shāyad tirī āñkhoñ kī gahrā.ī se ḳhā.if thā

vo mil jaa.e to pūchheñge

ki is kirdār kā anjām kyoñ itnā achānak hai

chal āñkheñ khol tujh se milne jhoñpaḌ-paTTī vaale bachche aa.e haiñ

kisī ko bhī yaqīñ aatā nahīñ hai tere jaane kā

so uTh kar baiTh billu-bārbar aur dekh terā dost sāhir ḳhaan aayā hai

use lagtā hai us ke rote rote tū uThegā aur kahegā

yaar ġham mat kar

guloñ kī zindagānī maut se kab ḳhatm hotī hai

mohabbat kī kahānī maut se kab ḳhatm hotī hai

are hero!

adakari na kar chal uTh

ki lakhon dil teri aankhon se dhaDkan lene aae hain

chalo mana teri aankhen kuchh aisi thin

ki is be-kar sayyare pe un ka der tak rahna

na banta tha

magar pyare!

tripan sal to kuchh bhi nahin hote

to kyon KHamosh hai kuchh kah

ki teri be-karan aawaz mein to lakhon sadiyon ki sadaen thin

tere chehre ka har gahra tassur aisa charKHa tha

ki jis par apne jazbe kaDhte the hum

so is charKHe ki kuk ab kis liye chup hai

kahani ka hidayat-kar bhi shayad teri aankhon ki gahrai se KHaif tha

wo mil jae to puchhenge

ki is kirdar ka anjam kyon itna achanak hai

chal aankhen khol tujh se milne jhonpaD-paTTi wale bachche aae hain

kisi ko bhi yaqin aata nahin hai tere jaane ka

so uTh kar baiTh billu-barbar aur dekh tera dost sahir KHan aaya hai

use lagta hai us ke rote rote tu uThega aur kahega

yar gham mat kar

gulon ki zindagani maut se kab KHatm hoti hai

mohabbat ki kahani maut se kab KHatm hoti hai