ek KHud-pasand amir zade ki tazhik

kahte haiñ ik amīr-zāde ko

thā ḳhadang-afganī kā shauq kahīñ

ḳhaslateñ jo amīr-zādoñ kī

lāzmī haiñ vo us meñ sab hī thiiñ

go ki rakhtā na thā hunar koī

us pe thā ḳhud-pasand aur ḳhud-bīñ

kuchh na thā par samajhtā thā sab kuchh

'ilm-e-tīr-o-kamāñ meñ apne ta.iiñ

vaah vā sunte sunte yāroñ kī

ho gayā thā hunar kā apne yaqīñ

al-ġharaz ek roz sahrā meñ

jab ki the saath sab jalīs-o-qarīñ

mashq-e-tīr-afagnī meñ thā masrūf

kar rahe the ḳhushāmadī tahsīñ

aa ke dekhā jo ik zarīf ne haal

vajh-e-tahsīñ huī na zehn-nashīñ

tiir jitne kamān se chhūTe

paa.e sab be-usūl-o-be-ā.īñ

jā ke bhūle se bhī na paḌtā thā

tiir āmāj-gah ke koī qarīñ

ek jaatā thā chhuT ke sū-e-shumāl

ek jaatā thā phaT ke sū-e-yamīñ

kuchh jo shoḳhī zarīf ko sūjhī

rakh ke bālā-e-tāq sab tamkīñ

ḳhāk-tode pe jā ke ho baiThā

log karte rahe chunān-o-chunīñ

nāvak-andāz bolā chillā kar

koī tujh ko junūñ hai ai miskīñ

yā ḳhafā ho ke ghar se aayā hai

yā ki dūbhar hai tujh ko jān-e-hazīñ

'arz kī chāra kyā hai is ke sivā

jab ki jā-e-gurez ho na kahīñ

zad se in be-panāh tīroñ ke

kahīñ jān-dār ko amaan nahīñ

mujh ko hir-phir ke shash-jihat meñ huzūr

amn kī ik jagah milī hai yahīñ

kahte hain ek amir-zade ko

tha KHadang-afgani ka shauq kahin

KHaslaten jo amir-zadon ki

lazmi hain wo us mein sab hi thin

go ki rakhta na tha hunar koi

us pe tha KHud-pasand aur KHud-bin

kuchh na tha par samajhta tha sab kuchh

'ilm-e-tir-o-kaman mein apne tain

wah wa sunte sunte yaron ki

ho gaya tha hunar ka apne yaqin

al-gharaz ek roz sahra mein

jab ki the sath sab jalis-o-qarin

mashq-e-tir-afagni mein tha masruf

kar rahe the KHushamadi tahsin

aa ke dekha jo ek zarif ne haal

wajh-e-tahsin hui na zehn-nashin

tir jitne kaman se chhuTe

pae sab be-usul-o-be-ain

ja ke bhule se bhi na paDta tha

tir aamaj-gah ke koi qarin

ek jata tha chhuT ke su-e-shumal

ek jata tha phaT ke su-e-yamin

kuchh jo shoKHi zarif ko sujhi

rakh ke baala-e-taq sab tamkin

KHak-tode pe ja ke ho baiTha

log karte rahe chunan-o-chunin

nawak-andaz bola chilla kar

koi tujh ko junun hai ai miskin

ya KHafa ho ke ghar se aaya hai

ya ki dubhar hai tujh ko jaan-e-hazin

'arz ki chaara kya hai is ke siwa

jab ki ja-e-gurez ho na kahin

zad se in be-panah tiron ke

kahin jaan-dar ko aman nahin

mujh ko hir-phir ke shash-jihat mein huzur

amn ki ek jagah mili hai yahin