mujassama

tūda-e-sang pe phaile hue ḳhush-rang nuqūsh

ek tarshā huā shaffāf badan paikar-e-ḳhākī se ham-āhang nuqūsh

jis pe bikhre haiñ mah-o-sāl ke sadiyoñ ke ġhubār

jaise tārīḳh ke aurāq ye mahfūz sutūr

tere but-ḳhānoñ meñ bikhrī huī ḳhushbū kā dhuāñ

aur kisī shaam ke mā'bad meñ kahīñ jalte hue sard dhūeñ vaale charāġh

vo pur-asrār mahak aur tire qurb-o-javār

kitnī mahkī huī sāñsoñ ke taqaddus kā nasha

ḳhāk-dānoñ ke tasarruf meñ vo aadam kā vaqār

vo ḳhudāoñ ke qarīnoñ meñ ḳhudā.ī kā shi'ār

aur ye garmī-e-sad-shām-o-sahar

baḳhsh detī hai harārat tire ajzā ko magar

par tirī sard jabīñ ubhrī hui tarshī huī phailī huī

ye kisī māhir-e-fan kā shahkār

ḳhaak insāñ ke barābar to nahīñ

tūda-e-sang hai ye ḳhaak kā paikar to nahīñ

tuda-e-sang pe phaile hue KHush-rang nuqush

ek tarsha hua shaffaf badan paikar-e-KHaki se ham-ahang nuqush

jis pe bikhre hain mah-o-sal ke sadiyon ke ghubar

jaise tariKH ke auraq ye mahfuz sutur

tere but-KHanon mein bikhri hui KHushbu ka dhuan

aur kisi sham ke ma'bad mein kahin jalte hue sard dhuen wale charagh

wo pur-asrar mahak aur tere qurb-o-jawar

kitni mahki hui sanson ke taqaddus ka nasha

KHak-danon ke tasarruf mein wo aadam ka waqar

wo KHudaon ke qarinon mein KHudai ka shi'ar

aur ye garmi-e-sad-sham-o-sahar

baKHsh deti hai hararat tere ajza ko magar

par teri sard jabin ubhri hui tarshi hui phaili hui

ye kisi mahir-e-fan ka shahkar

KHak insan ke barabar to nahin

tuda-e-sang hai ye KHak ka paikar to nahin