biswin sadi ka insan

mujhe sameTo

maiñ reza reza bikhar rahā huuñ

na jaane maiñ baḌh rahā huuñ

yā apne hī ġhubār-e-safar meñ har pal utar rahā huuñ

na jaane maiñ jī rahā huuñ

yā apne hī tarāshe hue na.e rāstoñ kī tanhā.iyoñ meñ har lahza mar rahā huuñ

maiñ ek patthar sahī magar har savāl kā bāz-gasht ban kar javāb dūñgā

mujhe pukāro mujhe sadā do

maiñ ek sahrā sahī magar mujh pe ghir ke barso

mujhe mahakne kā valvala do

maiñ ik samundar sahī magar āftāb kī tarah mujh pe chamko

mujhe bulandī kī samt uḌne kā hausla do

mujhe na toḌo ki maiñ gul-e-tar sahī

magar os ke bajā.e lahū meñ tar huuñ

mujhe na maaro

maiñ zindagī ke jamāl aur gahmā-gahmiyoñ kā payāmbar huuñ

mujhe bachāo ki maiñ zamīñ huuñ

karoḌoñ karoḌoñ kī kā.enāt-e-basīt meñ sirf maiñ hī huuñ

jo ḳhudā kā ghar huuñ

mujhe sameTo

main reza reza bikhar raha hun

na jaane main baDh raha hun

ya apne hi ghubar-e-safar mein har pal utar raha hun

na jaane main ji raha hun

ya apne hi tarashe hue nae raston ki tanhaiyon mein har lahza mar raha hun

main ek patthar sahi magar har sawal ka baz-gasht ban kar jawab dunga

mujhe pukaro mujhe sada do

main ek sahra sahi magar mujh pe ghir ke barso

mujhe mahakne ka walwala do

main ek samundar sahi magar aaftab ki tarah mujh pe chamko

mujhe bulandi ki samt uDne ka hausla do

mujhe na toDo ki main gul-e-tar sahi

magar os ke bajae lahu mein tar hun

mujhe na maro

main zindagi ke jamal aur gahma-gahmiyon ka payambar hun

mujhe bachao ki main zamin hun

karoDon karoDon ki kaenat-e-basit mein sirf main hi hun

jo KHuda ka ghar hun