walida marhuma ki yaad mein

zarra zarra dahr kā zindānī-e-taqdīr hai

parda-e-majbūrī o bechārgī tadbīr hai

āsmāñ majbūr hai shams o qamar majbūr haiñ

anjum-e-sīmāb-pā raftār par majbūr haiñ

hai shikast anjām ġhunche kā subū gulzār meñ

sabza o gul bhī haiñ majbūr-e-numū gulzār meñ

naġhma-e-bulbul ho yā āvāz-e-ḳhāmosh-e-zamīr

hai isī zanjīr-e-ālam-gīr meñ har shai asiir

aañkh par hotā hai jab ye sirr-e-majbūrī ayaañ

ḳhushk ho jaatā hai dil meñ ashk kā sail-e-ravāñ

qalb-e-insānī meñ raqs-e-aish-o-ġham rahtā nahīñ

naġhma rah jaatā hai lutf-e-zer-o-bam rahtā nahīñ

ilm o hikmat rahzan-e-sāmān-e-ashk-o-āh hai

ya.anī ik almās kā TukḌā dil-e-āgāh hai

garche mere baaġh meñ shabnam kī shādābī nahīñ

aañkh merī māya-dār-e-ashk-e-unnābī nahīñ

jāntā huuñ aah meñ ālām-e-insānī kā raaz

hai navā-e-shikva se ḳhālī mirī fitrat kā saaz

mere lab par qissa-e-nairañgi-e-daurāñ nahīñ

dil mirā hairāñ nahīñ ḳhanda nahīñ giryāñ nahīñ

par tirī tasvīr qāsid girya-e-paiham kī hai

aah ye tardīd merī hikmat-e-mohkam kī hai

girya-e-sarshār se buniyād-e-jāñ pā.inda hai

dard ke irfāñ se aql-e-sañg-dil sharminda hai

mauj-e-dūd-e-āh se ā.īna hai raushan mirā

ganj-e-āb-āvrd se māmūr hai dāman mirā

hairatī huuñ maiñ tirī tasvīr ke e.ajāz kā

ruḳh badal Daalā hai jis ne vaqt kī parvāz kā

rafta o hāzir ko goyā pā-ba-pā is ne kiyā

ahd-e-tiflī se mujhe phir āshnā is ne kiyā

jab tire dāman meñ paltī thī vo jān-e-nā-tavāñ

baat se achchhī tarah mahram na thī jis kī zabāñ

aur ab charche haiñ jis kī shoḳhī-e-guftār ke

be-bahā motī haiñ jis kī chashm-e-gauhar-bār ke

ilm kī sañjīda-guftārī buḌhāpe kā shu.ūr

dunyavī e.azāz kī shaukat javānī kā ġhurūr

zindagī kī auj-gāhoñ se utar aate haiñ ham

sohbat-e-mādar meñ tifl-e-sāda rah jaate haiñ ham

be-takalluf ḳhanda-zan haiñ fikr se āzād haiñ

phir usī kho.e hue firdaus meñ ābād haiñ

kis ko ab hogā vatan meñ aah merā intizār

kaun merā ḳhat na aane se rahegā be-qarār

ḳhāk-e-marqad par tirī le kar ye fariyād ā.ūñgā

ab duā-e-nīm-shab meñ kis ko maiñ yaad ā.ūñgā

tarbiyat se terī meñ anjum kā ham-qismat huā

ghar mire ajdād kā sarmāya-e-izzat huā

daftar-e-hastī meñ thī zarrīñ varaq terī hayāt

thī sarāpā diin o duniyā kā sabaq terī hayāt

umr bhar terī mohabbat merī ḳhidmat-gar rahī

maiñ tirī ḳhidmat ke qābil jab huā tū chal basī

vo javāñ-qāmat meñ hai jo sūrat-e-sarv-e-buland

terī ḳhidmat se huā jo mujh se baḌh kar bahra-mand

kārobār-e-zindagānī meñ vo ham-pahlū mirā

vo mohabbat meñ tirī tasvīr vo baazū mirā

tujh ko misl-e-tiflak-e-be-dast-o-pā rotā hai vo

sabr se nā-āshnā sub.h o masā rotā hai vo

tuḳhm jis kā tū hamārī kisht-e-jāñ meñ bo ga.ī

shirkat-e-ġham se vo ulfat aur mohkam ho ga.ī

aah ye duniyā ye mātam-ḳhāna-e-barnā-o-pīr

aadmī hai kis tilism-e-dosh-o-fardā meñ asiir

kitnī mushkil zindagī hai kis qadar āsāñ hai maut

gulshan-e-hastī meñ mānind-e-nasīm arzāñ hai maut

zalzale haiñ bijliyāñ haiñ qaht haiñ ālām haiñ

kaisī kaisī duḳhtarān-e-mādar-e-ayyām haiñ

kalba-e-iflās meñ daulat ke kāshāne meñ maut

dasht o dar meñ shahr meñ gulshan meñ vīrāne meñ maut

maut hai hañgāma-ārā qulzum-e-ḳhāmosh meñ

Duub jaate haiñ safīne mauj kī āġhosh meñ

ne majāl-e-shikva hai ne tāqat-e-guftār hai

zindagānī kyā hai ik tauq-e-gulū-afshār hai

qāfile meñ ġhair fariyād-e-dirā kuchh bhī nahīñ

ik matā-e-dīda-e-tar ke sivā kuchh bhī nahīñ

ḳhatm ho jā.egā lekin imtihāñ kā daur bhī

haiñ pas-e-noh parda-e-gardūñ abhī daur aur bhī

siina chaak is gulsitāñ meñ lāla-o-gul haiñ to kyā

naala o fariyād par majbūr bulbul haiñ to kyā

jhāḌiyāñ jin ke qafas meñ qaid hai āh-e-ḳhizāñ

sabz kar degī unheñ bād-e-bahār-e-jāvedāñ

ḳhufta-ḳhāk-e-pai sipar meñ hai sharār apnā to kyā

aarzī mahmil hai ye musht-e-ġhubār apnā to kyā

zindagī kī aag kā anjām ḳhākistar nahīñ

TūTnā jis kā muqaddar ho ye vo gauhar nahīñ

zindagī mahbūb aisī dīda-e-qudrat meñ hai

zauq-e-hifz-e-zindagī har chiiz kī fitrat meñ hai

maut ke hāthoñ se miT saktā agar naqsh-e-hayāt

aam yuuñ us ko na kar detā nizām-e-kā.enāt

hai agar arzāñ to ye samjho ajal kuchh bhī nahīñ

jis tarah sone se jiine meñ ḳhalal kuchh bhī nahīñ

aah ġhāfil maut kā rāz-e-nihāñ kuchh aur hai

naqsh kī nā-pā.edārī se ayaañ kuchh aur hai

jannat-e-nazāra hai naqsh-e-havā bālā-e-āb

mauj-e-muztar toḌ kar ta.amīr kartī hai habāb

mauj ke dāman meñ phir us ko chhupā detī hai ye

kitnī bedardī se naqsh apnā miTā detī hai ye

phir na kar saktī habāb apnā agar paidā havā

toḌne meñ us ke yuuñ hotī na be-parvā havā

is ravish kā kyā asar hai haiyat-e-tāmīr par

ye to hujjat hai havā kī quvvat-e-tāmīr par

fitrat-e-hastī shahīd-e-ārzū rahtī na ho

ḳhūb-tar paikar kī us ko justujū rahtī na ho

aah sīmāb-e-pareshāñ anjum-e-gardūñ-faroz

shoḳh ye chiñgāriyāñ mamnūn-e-shab hai jin kā soz

aql jis se sar-ba-zānū hai vo muddat in kī hai

sarguzisht-e-nau-e-insāñ ek saa.at un kī hai

phir ye insāñ aañ sū-e-aflāk hai jis kī nazar

qudsiyoñ se bhī maqāsid meñ hai jo pākīza-tar

jo misāl-e-sham.a raushan mahfil-e-qudrat meñ hai

āsmāñ ik nuqta jis kī vus.at-e-fitrat meñ hai

jis kī nādānī sadāqat ke liye betāb hai

jis kā nāḳhun sāz-e-hastī ke liye mizrāb hai

sho.ala ye kam-tar hai gardūñ ke sharāroñ se bhī kyā

kam-bahā hai āftāb apnā sitāroñ se bhī kyā

tuḳhm-e-gul kī aañkh zer-e-ḳhāk bhī be-ḳhvāb hai

kis qadar nashv-o-numā ke vāste betāb hai

zindagī kā sho.ala is daane meñ jo mastūr hai

ḳhud-numā.ī ḳhud-fazā.ī ke liye majbūr hai

sardi-e-marqad se bhī afsurda ho saktā nahīñ

ḳhaak meñ dab kar bhī apnā soz kho saktā nahīñ

phuul ban kar apnī turbat se nikal aatā hai ye

maut se goyā qabā-e-zindagī paatā hai ye

hai lahad is quvvat-e-āshufta kī shīrāza-band

Dāltī hai gardan-e-gardūñ meñ jo apnī kamand

maut tajdīd-e-mazāq-e-zindagī kā naam hai

ḳhvāb ke parde meñ bedārī kā ik paiġhām hai

ḳhūgar-e-parvāz ko parvāz meñ Dar kuchh nahīñ

maut is gulshan meñ juz sanjīdan-e-par kuchh nahīñ

kahte haiñ ahl-e-jahāñ dard-e-ajal hai lā-davā

zaḳhm-e-furqat vaqt ke marham se paatā hai shifā

dil magar ġham marne vāloñ kā jahāñ ābād hai

halqa-e-zanjīr-e-sub.h-o-shām se āzād hai

vaqt ke afsūñ se thamtā nāla-e-mātam nahīñ

vaqt zaḳhm-e-teġh-e-furqat kā koī marham nahīñ

sar pe aa jaatī hai jab koī musībat nā-gahāñ

ashk paiham dīda-e-insāñ se hote haiñ ravāñ

rabt ho jaatā hai dil ko naala o fariyād se

ḳhūn-e-dil bahtā hai āñkhoñ kī sarishk-ābād se

aadmī tāb-e-shakebā.ī se go mahrūm hai

us kī fitrat meñ ye ik ehsās-e-nā-mālūm hai

jauhar-e-insāñ adam se āshnā hotā nahīñ

aañkh se ġhā.eb to hotā hai fanā hotā nahīñ

raḳht-e-hastī ḳhāk-e-ġham kī sho.ala-afshānī se hai

sard ye aag is latīf ehsās ke paanī se hai

aah ye zabt-e-fuġhāñ ġhaflat kī ḳhāmoshī nahīñ

āgahī hai ye dilāsā.ī farāmoshī nahīñ

parda-e-mashriq se jis dam jalva-gar hotī hai sub.h

daaġh shab kā dāman-e-āfāq se dhotī hai sub.h

lāla-e-afsurda ko ātish-qabā kartī hai ye

be-zabāñ taa.ir ko sarmast-e-navā kartī hai ye

sīna-e-bulbul ke zindāñ se sarod āzād hai

saikḌoñ naġhmoñ se bād-e-sub.h-dam-ābād hai

ḳhuftagān-e-lāla-zār o kohsār o ruud baar

hote haiñ āḳhir urūs-e-zindagī se ham-kanār

ye agar ā.īn-e-hastī hai ki ho har shaam sub.h

marqad-e-insāñ kī shab kā kyuuñ na ho anjām sub.h

dām-e-sīmīn-e-taḳhayyul hai mirā āfāq-gīr

kar liyā hai jis se terī yaad ko maiñ ne asiir

yaad se terī dil-e-dard āshnā māmūr hai

jaise ka.abe meñ duāoñ se fazā māmūr hai

vo farā.ez kā tasalsul naam hai jis kā hayāt

jalva-gāheñ us kī haiñ lākhoñ jahān-e-be-sabāt

muḳhtalif har manzil-e-hastī ko rasm-o-rāh hai

āḳhirat bhī zindagī kī ek jaulāñ-gāh hai

hai vahāñ be-hāsilī kisht-e-ajal ke vāste

sāzgār āb-o-havā tuḳhm-e-amal ke vāste

nūr-e-fitrat zulmat-e-paikar kā zindānī nahīñ

tañg aisā halqa-e-afkār-e-insānī nahīñ

zindagānī thī tirī mahtāb se tābinda-tar

ḳhūb-tar thā sub.h ke taare se bhī terā safar

misl-e-aivān-e-sahar marqad farozāñ ho tirā

nuur se māmūr ye ḳhākī shabistāñ ho tirā

āsmāñ terī lahad par shabnam-afshānī kare

sabza-e-nau-rasta is ghar kī nigahbānī kare

zarra zarra dahr ka zindani-e-taqdir hai

parda-e-majburi o bechaargi tadbir hai

aasman majbur hai shams o qamar majbur hain

anjum-e-simab-pa raftar par majbur hain

hai shikast anjam ghunche ka subu gulzar mein

sabza o gul bhi hain majbur-e-numu gulzar mein

naghma-e-bulbul ho ya aawaz-e-KHamosh-e-zamir

hai isi zanjir-e-alam-gir mein har shai asir

aankh par hota hai jab ye sirr-e-majburi ayan

KHushk ho jata hai dil mein ashk ka sail-e-rawan

qalb-e-insani mein raqs-e-aish-o-gham rahta nahin

naghma rah jata hai lutf-e-zer-o-bam rahta nahin

ilm o hikmat rahzan-e-saman-e-ashk-o-ah hai

yani ek almas ka TukDa dil-e-agah hai

garche mere bagh mein shabnam ki shadabi nahin

aankh meri maya-dar-e-ashk-e-unnabi nahin

jaanta hun aah mein aalam-e-insani ka raaz

hai nawa-e-shikwa se KHali meri fitrat ka saz

mere lab par qissa-e-nairangi-e-dauran nahin

dil mera hairan nahin KHanda nahin giryan nahin

par teri taswir qasid girya-e-paiham ki hai

aah ye tardid meri hikmat-e-mohkam ki hai

girya-e-sarshaar se buniyaad-e-jaan painda hai

dard ke irfan se aql-e-sang-dil sharminda hai

mauj-e-dud-e-ah se aaina hai raushan mera

ganj-e-ab-awrd se mamur hai daman mera

hairati hun main teri taswir ke eajaz ka

ruKH badal Dala hai jis ne waqt ki parwaz ka

rafta o hazir ko goya pa-ba-pa is ne kiya

ahd-e-tifli se mujhe phir aashna is ne kiya

jab tere daman mein palti thi wo jaan-e-na-tawan

baat se achchhi tarah mahram na thi jis ki zaban

aur ab charche hain jis ki shoKHi-e-guftar ke

be-baha moti hain jis ki chashm-e-gauhar-bar ke

ilm ki sanjida-guftari buDhape ka shuur

dunyawi eazaz ki shaukat jawani ka ghurur

zindagi ki auj-gahon se utar aate hain hum

sohbat-e-madar mein tifl-e-sada rah jate hain hum

be-takalluf KHanda-zan hain fikr se aazad hain

phir usi khoe hue firdaus mein aabaad hain

kis ko ab hoga watan mein aah mera intizar

kaun mera KHat na aane se rahega be-qarar

KHak-e-marqad par teri le kar ye fariyaad aaunga

ab dua-e-nim-shab mein kis ko main yaad aaunga

tarbiyat se teri mein anjum ka ham-qismat hua

ghar mere ajdad ka sarmaya-e-izzat hua

daftar-e-hasti mein thi zarrin waraq teri hayat

thi sarapa din o duniya ka sabaq teri hayat

umr bhar teri mohabbat meri KHidmat-gar rahi

main teri KHidmat ke qabil jab hua tu chal basi

wo jawan-qamat mein hai jo surat-e-sarw-e-buland

teri KHidmat se hua jo mujh se baDh kar bahra-mand

karobar-e-zindagani mein wo ham-pahlu mera

wo mohabbat mein teri taswir wo bazu mera

tujh ko misl-e-tiflak-e-be-dast-o-pa rota hai wo

sabr se na-ashna subh o masa rota hai wo

tuKHm jis ka tu hamari kisht-e-jaan mein bo gai

shirkat-e-gham se wo ulfat aur mohkam ho gai

aah ye duniya ye matam-KHana-e-barna-o-pir

aadmi hai kis tilism-e-dosh-o-farda mein asir

kitni mushkil zindagi hai kis qadar aasan hai maut

gulshan-e-hasti mein manind-e-nasim arzan hai maut

zalzale hain bijliyan hain qaht hain aalam hain

kaisi kaisi duKHtaran-e-madar-e-ayyam hain

kalba-e-iflas mein daulat ke kashane mein maut

dasht o dar mein shahr mein gulshan mein virane mein maut

maut hai hangama-ara qulzum-e-KHamosh mein

Dub jate hain safine mauj ki aaghosh mein

ne majal-e-shikwa hai ne taqat-e-guftar hai

zindagani kya hai ek tauq-e-gulu-afshaar hai

qafile mein ghair fariyaad-e-dira kuchh bhi nahin

ek mata-e-dida-e-tar ke siwa kuchh bhi nahin

KHatm ho jaega lekin imtihan ka daur bhi

hain pas-e-noh parda-e-gardun abhi daur aur bhi

sina chaak is gulsitan mein lala-o-gul hain to kya

nala o fariyaad par majbur bulbul hain to kya

jhaDiyan jin ke qafas mein qaid hai aah-e-KHizan

sabz kar degi unhen baad-e-bahaar-e-jawedan

KHufta-KHak-e-pai sipar mein hai sharar apna to kya

aarzi mahmil hai ye musht-e-ghubar apna to kya

zindagi ki aag ka anjam KHakistar nahin

TuTna jis ka muqaddar ho ye wo gauhar nahin

zindagi mahbub aisi dida-e-qudrat mein hai

zauq-e-hifz-e-zindagi har chiz ki fitrat mein hai

maut ke hathon se miT sakta agar naqsh-e-hayat

aam yun us ko na kar deta nizam-e-kaenat

hai agar arzan to ye samjho ajal kuchh bhi nahin

jis tarah sone se jine mein KHalal kuchh bhi nahin

aah ghafil maut ka raaz-e-nihan kuchh aur hai

naqsh ki na-paedari se ayan kuchh aur hai

jannat-e-nazara hai naqsh-e-hawa baala-e-ab

mauj-e-muztar toD kar tamir karti hai habab

mauj ke daman mein phir us ko chhupa deti hai ye

kitni bedardi se naqsh apna miTa deti hai ye

phir na kar sakti habab apna agar paida hawa

toDne mein us ke yun hoti na be-parwa hawa

is rawish ka kya asar hai haiyat-e-tamir par

ye to hujjat hai hawa ki quwwat-e-tamir par

fitrat-e-hasti shahid-e-arzu rahti na ho

KHub-tar paikar ki us ko justuju rahti na ho

aah simab-e-pareshan anjum-e-gardun-faroz

shoKH ye chingariyan mamnun-e-shab hai jin ka soz

aql jis se sar-ba-zanu hai wo muddat in ki hai

sarguzisht-e-nau-e-insan ek saat un ki hai

phir ye insan aan su-e-aflak hai jis ki nazar

qudsiyon se bhi maqasid mein hai jo pakiza-tar

jo misal-e-shama raushan mahfil-e-qudrat mein hai

aasman ek nuqta jis ki wusat-e-fitrat mein hai

jis ki nadani sadaqat ke liye betab hai

jis ka naKHun saz-e-hasti ke liye mizrab hai

shoala ye kam-tar hai gardun ke shararon se bhi kya

kam-baha hai aaftab apna sitaron se bhi kya

tuKHm-e-gul ki aankh zer-e-KHak bhi be-KHwab hai

kis qadar nashw-o-numa ke waste betab hai

zindagi ka shoala is dane mein jo mastur hai

KHud-numai KHud-fazai ke liye majbur hai

sardi-e-marqad se bhi afsurda ho sakta nahin

KHak mein dab kar bhi apna soz kho sakta nahin

phul ban kar apni turbat se nikal aata hai ye

maut se goya qaba-e-zindagi pata hai ye

hai lahad is quwwat-e-ashufta ki shiraaza-band

Dalti hai gardan-e-gardun mein jo apni kamand

maut tajdid-e-mazaq-e-zindagi ka nam hai

KHwab ke parde mein bedari ka ek paigham hai

KHugar-e-parwaz ko parwaz mein Dar kuchh nahin

maut is gulshan mein juz sanjidan-e-par kuchh nahin

kahte hain ahl-e-jahan dard-e-ajal hai la-dawa

zaKHm-e-furqat waqt ke marham se pata hai shifa

dil magar gham marne walon ka jahan aabaad hai

halqa-e-zanjir-e-subh-o-sham se aazad hai

waqt ke afsun se thamta nala-e-matam nahin

waqt zaKHm-e-tegh-e-furqat ka koi marham nahin

sar pe aa jati hai jab koi musibat na-gahan

ashk paiham dida-e-insan se hote hain rawan

rabt ho jata hai dil ko nala o fariyaad se

KHun-e-dil bahta hai aankhon ki sarishk-abaad se

aadmi tab-e-shakebai se go mahrum hai

us ki fitrat mein ye ek ehsas-e-na-malum hai

jauhar-e-insan adam se aashna hota nahin

aankh se ghaeb to hota hai fana hota nahin

raKHt-e-hasti KHak-e-gham ki shoala-afshani se hai

sard ye aag is latif ehsas ke pani se hai

aah ye zabt-e-fughan ghaflat ki KHamoshi nahin

aagahi hai ye dilasai faramoshi nahin

parda-e-mashriq se jis dam jalwa-gar hoti hai subh

dagh shab ka daman-e-afaq se dhoti hai subh

lala-e-afsurda ko aatish-qaba karti hai ye

be-zaban tair ko sarmast-e-nawa karti hai ye

sina-e-bulbul ke zindan se sarod aazad hai

saikDon naghmon se baad-e-subh-dam-abaad hai

KHuftagan-e-lala-zar o kohsar o rud bar

hote hain aaKHir urus-e-zindagi se ham-kanar

ye agar aain-e-hasti hai ki ho har sham subh

marqad-e-insan ki shab ka kyun na ho anjam subh

dam-e-simin-e-taKHayyul hai mera aafaq-gir

kar liya hai jis se teri yaad ko main ne asir

yaad se teri dil-e-dard aashna mamur hai

jaise kabe mein duaon se faza mamur hai

wo faraez ka tasalsul nam hai jis ka hayat

jalwa-gahen us ki hain lakhon jahan-e-be-sabaat

muKHtalif har manzil-e-hasti ko rasm-o-rah hai

aaKHirat bhi zindagi ki ek jaulan-gah hai

hai wahan be-hasili kisht-e-ajal ke waste

sazgar aab-o-hawa tuKHm-e-amal ke waste

nur-e-fitrat zulmat-e-paikar ka zindani nahin

tang aisa halqa-e-afkar-e-insani nahin

zindagani thi teri mahtab se tabinda-tar

KHub-tar tha subh ke tare se bhi tera safar

misl-e-aiwan-e-sahar marqad farozan ho tera

nur se mamur ye KHaki shabistan ho tera

aasman teri lahad par shabnam-afshani kare

sabza-e-nau-rasta is ghar ki nigahbani kare