tumhaare baad

ammī tumhāre baa'd

har baar ham

ek dūsre se

āḳhirī baar milte haiñ

zindagī be-yaqīnī kā

saaya ban kar rah ga.ī hai

maut hamāre number

lagā chukī hai

ham tum se

milne kī ḳhātir

apnī apnī baarī kā

intizār karte haiñ

zamīn par

apne din shumār karte haiñ

hameñ tum se

kashīd kiyā gayā

hamāre ḳhuun ke group

aur dimāġh kī banāvaT meñ

tumheñ bhar diyā gayā

aur dil kī jagah

tumheñ rakh diyā gayā

phir achānak tum ham se judā ho ga.iiñ

aur hameñ mubtalā kar diyā gayā

āñsuoñ ke karb-o-balā meñ

aur ham tum se milne ke liye

maut se pyaar karne lage

aur intizār karne lage

ki jab ham jism se āzād hoñge

to tumhārī narm aur dil-gīr mohabbat kī

bāñhoñ meñ tumheñ

bosa de sakeñge

tumhāre siine se lag kar

hañs aur ro sakeñge

tumhārī ḳhūbsūrat āñkhoñ se

ḳhud ko dekh sakeñge

tumhāre saath hamesha ke liye

jī sakeñge

ammi tumhaare ba'd

har bar hum

ek dusre se

aaKHiri bar milte hain

zindagi be-yaqini ka

saya ban kar rah gai hai

maut hamare number

laga chuki hai

hum tum se

milne ki KHatir

apni apni bari ka

intizar karte hain

zamin par

apne din shumar karte hain

hamein tum se

kashid kiya gaya

hamare KHun ke group

aur dimagh ki banawaT mein

tumhein bhar diya gaya

aur dil ki jagah

tumhein rakh diya gaya

phir achanak tum hum se juda ho gain

aur hamein mubtala kar diya gaya

aansuon ke karb-o-bala mein

aur hum tum se milne ke liye

maut se pyar karne lage

aur intizar karne lage

ki jab hum jism se aazad honge

to tumhaari narm aur dil-gir mohabbat ki

banhon mein tumhein

bosa de sakenge

tumhaare sine se lag kar

hans aur ro sakenge

tumhaari KHubsurat aankhon se

KHud ko dekh sakenge

tumhaare sath hamesha ke liye

ji sakenge