december

nayā saal aane kī hai to ḳhushī par

december ke jaane kā ġham bhī bahut hai

vo manzar hasīñ aañkh meñ tairte haiñ

daraḳhtoñ ne phūloñ ke zevar the pahne

gulāboñ pe joban kī surḳhī chaḌhī thī

zamīnoñ pe shabnam ke motī the bikhre

havāoñ se kohra gale mil rahā thā

pahāḌoñ kī godī se nīche utar kar

zamīnoñ pe dariyā safar kar rahā thā

kisī mast-maulā gulu-kār jaisā

tarannum meñ jharnā ġhazal paḌh rahā thā

parindoñ kā bustān mahkā rahe the

ġhul-e-tar ḳhiyābān mahkā rahe the

kaḌāke kī sardī meñ bhī rut javāñ thī

ḳhayāloñ ko armān mahkā rahe the

jidhar bhī uThā kar nazar dekhtā thā

mohabbat se labrez the saare manzar

zamāne kī har shai hasīñ lag rahī thī

gul-e-'ishq jab mere dil meñ khilā thā

december ke jaane kā yuuñ hī na ġham hai

vo māh-e-december meñ mujh ko milā thā

nayā saal aane kī hai to ḳhushī par

december ke jaane kā ġham bhī bahut hai

naya sal aane ki hai to KHushi par

december ke jaane ka gham bhi bahut hai

wo manzar hasin aankh mein tairte hain

daraKHton ne phulon ke zewar the pahne

gulabon pe joban ki surKHi chaDhi thi

zaminon pe shabnam ke moti the bikhre

hawaon se kohra gale mil raha tha

pahaDon ki godi se niche utar kar

zaminon pe dariya safar kar raha tha

kisi mast-maula gulu-kar jaisa

tarannum mein jharna ghazal paDh raha tha

parindon ka bustan mahka rahe the

ghul-e-tar KHiyaban mahka rahe the

kaDake ki sardi mein bhi rut jawan thi

KHayalon ko arman mahka rahe the

jidhar bhi uTha kar nazar dekhta tha

mohabbat se labrez the sare manzar

zamane ki har shai hasin lag rahi thi

gul-e-'ishq jab mere dil mein khila tha

december ke jaane ka yun hi na gham hai

wo mah-e-december mein mujh ko mila tha

naya sal aane ki hai to KHushi par

december ke jaane ka gham bhi bahut hai