safar ke waqt

tumhārī yaad mire dil kā daaġh hai lekin

safar ke vaqt to be-tarah yaad aatī ho

baras baras kī ho aadat kā jab hisāb to phir

bahut satātī ho jānam bahut satātī ho

maiñ bhuul jā.ūñ magar kaise bhuul jā.ūñ bhalā

azāb-e-jāñ kī haqīqat kā apnī afsāna

mire safar ke vo lamhe tumhārī pur-hālī

vo baat baat mujhe baar baar samjhānā

ye pāñch kurte haiñ dekho ye pāñch pājāme

Dale hue haiñ qamar-bañd in meñ aur dekho

ye shave-box hai aur ye hai old spice

nahīñ huzūr kī jhoñjal kā ab koī baa.is

ye Diary hai aur is meñ pate haiñ aur number

ise ḳhayāl se bakse kī jeb meñ rakhnā

hai arz ''hazrat-e-ġhā.eb-dimāġh'' bandī kī

ki apne aib kī hālat ko ġhaib meñ rakhnā

ye tiin coat haiñ patlūn haiñ ye Tā.iyāñ haiñ

bañdhī huī haiñ ye sab tum ko kuchh nahīñ karnā

ye william hai 'onTal' hai aur 'TarpaTī-nāl'

tum in ke saath mirī jaañ drink se Darnā

bahut ziyāda na piinā ki kuchh na yaad aa.e

jo lucknow meñ huā thā vo ab dobāra na ho

ho tum suḳhan kī anā aur tamkanat jānam

mazāq kā kisī 'inshā' ko tum se yaarā na ho

vo 'jaun' jo nazar aatā hai us kā zikr nahīñ

tum apne 'jaun' kā jo tum meñ hai bharam rakhnā

ajiib baat hai jo tum se kah rahī huuñ maiñ

ḳhayāl merā ziyāda aur apnā kam rakhnā

ho tum balā ke baġhāvat-pasand talḳh-kalām

ḳhud apne haq meñ ik āzār ho ga.e ho tum

tumhāre saare sahāba ne tum ko chhoḌ diyā

mujhe qalaq hai ki be-yār ho ga.e ho tum

ye bank-kār manager ye apne technocrat

koī bhī shub.h nahīñ haiñ ye ek abas kā ThiThol

maiñ ḳhud bhī in ko cro-magnon samajhtī huuñ

ye shāndār janāvar haiñ daftaroñ kā maḳhaul

maiñ jāntī huuñ ki tum sun nahīñ rahe mirī baat

samāj jhuuT sahī phir bhī us kā paas karo

hai tum ko taish hai bālishtiyoñ kī ye duniyā

to phir qarīne se tum un ko be-libās karo

tum ek saada o barjasta aadmī Thahre

mizāj-e-vaqt ko tum aaj tak nahīñ samjhe

jo chiiz sab se zarūrī hai vo maiñ bhuul ga.ī

ye passport hai is ko sambhāl ke rakhnā

jo ye na ho to ḳhudā bhī bashar tak aa na sake

so tum shu.ūr kā apne kamāl kar rakhnā

mirī shikast ke zaḳhmoñ kī sozish-e-jāved

nahīñ rahā mire zaḳhmoñ kā ab hisāb koī

hai ab jo haal mirā vo ajab tamāshā hai

mirā azaab nahīñ ab mirā azaab koī

nahīñ koī mirī manzil pe hai safar darpesh

hai gard gard abas mujh ko dar-ba-dar pesh

tumhaari yaad mere dil ka dagh hai lekin

safar ke waqt to be-tarah yaad aati ho

baras baras ki ho aadat ka jab hisab to phir

bahut satati ho jaanam bahut satati ho

main bhul jaun magar kaise bhul jaun bhala

azab-e-jaan ki haqiqat ka apni afsana

mere safar ke wo lamhe tumhaari pur-haali

wo baat baat mujhe bar bar samjhana

ye panch kurte hain dekho ye panch pajame

Dale hue hain qamar-band in mein aur dekho

ye shawe-box hai aur ye hai old spice

nahin huzur ki jhonjal ka ab koi bais

ye Diary hai aur is mein pate hain aur number

ise KHayal se bakse ki jeb mein rakhna

hai arz hazrat-e-ghaeb-dimagh bandi ki

ki apne aib ki haalat ko ghaib mein rakhna

ye tin coat hain patlun hain ye Taiyan hain

bandhi hui hain ye sab tum ko kuchh nahin karna

ye william hai 'onTal' hai aur 'TarpaTi-nal'

tum in ke sath meri jaan drink se Darna

bahut ziyaada na pina ki kuchh na yaad aae

jo lucknow mein hua tha wo ab dobara na ho

ho tum suKHan ki ana aur tamkanat jaanam

mazaq ka kisi 'insha' ko tum se yara na ho

wo 'jaun' jo nazar aata hai us ka zikr nahin

tum apne 'jaun' ka jo tum mein hai bharam rakhna

ajib baat hai jo tum se kah rahi hun main

KHayal mera ziyaada aur apna kam rakhna

ho tum bala ke baghawat-pasand talKH-kalam

KHud apne haq mein ek aazar ho gae ho tum

tumhaare sare sahaba ne tum ko chhoD diya

mujhe qalaq hai ki be-yar ho gae ho tum

ye bank-kar manager ye apne technocrat

koi bhi shubh nahin hain ye ek abas ka ThiThol

main KHud bhi in ko cro-magnon samajhti hun

ye shandar janawar hain daftaron ka maKHaul

main jaanti hun ki tum sun nahin rahe meri baat

samaj jhuT sahi phir bhi us ka pas karo

hai tum ko taish hai baalishtiyon ki ye duniya

to phir qarine se tum un ko be-libas karo

tum ek sada o barjasta aadmi Thahre

mizaj-e-waqt ko tum aaj tak nahin samjhe

jo chiz sab se zaruri hai wo main bhul gai

ye passport hai is ko sambhaal ke rakhna

jo ye na ho to KHuda bhi bashar tak aa na sake

so tum shuur ka apne kamal kar rakhna

meri shikast ke zaKHmon ki sozish-e-jawed

nahin raha mere zaKHmon ka ab hisab koi

hai ab jo haal mera wo ajab tamasha hai

mera azab nahin ab mera azab koi

nahin koi meri manzil pe hai safar darpesh

hai gard gard abas mujh ko dar-ba-dar pesh