tab aur ab

haa.e kyā din the vo

jab nazar meñ mohabbat kā ehsās thā

ek ik lafz ehsās kā daas thā

apnā har ek lamha bahut ḳhaas thā

sab ḳhushī ke parind

apne āñgan ke piñjre meñ the

chāñd ḳhushbū sabā rang nam titliyāñ

qahqahe chashm-o-dil ke jharoke meñ the

ham kisī kī nigāhoñ ke halqe meñ the

saarī duniyā ke sukh apne lahje meñ the

ham to nashshe meñ the

chāñd tāroñ se gap-shap kā mā'mūl thā

sang-reza bhī apne liye phuul thā

ye balā kā safar bhī faqat dhuul thā

ab ye hālāt haiñ

ham umangoñ kī ujḌī huī raat haiñ

sabz peḌoñ se bichhḌe hue paat haiñ

harf-e-haihāt haiñ

ye tire hijr hī ke karāmāt haiñ

ab koī raushnī

kam-nazar kī nigāhoñ ko bhātī nahīñ

koī sapnoñ kī lau

aañkh kī putliyoñ meñ ujālā jagātī nahīñ

ab samā'at ko koī madhurtā lubhātī nahīñ

koī hamdam nahīñ koī sāthī nahīñ

niiñd aatī nahīñ

hae kya din the wo

jab nazar mein mohabbat ka ehsas tha

ek ek lafz ehsas ka das tha

apna har ek lamha bahut KHas tha

sab KHushi ke parind

apne aangan ke pinjre mein the

chand KHushbu saba rang nam titliyan

qahqahe chashm-o-dil ke jharoke mein the

hum kisi ki nigahon ke halqe mein the

sari duniya ke sukh apne lahje mein the

hum to nashshe mein the

chand taron se gap-shap ka ma'mul tha

sang-reza bhi apne liye phul tha

ye bala ka safar bhi faqat dhul tha

ab ye haalat hain

hum umangon ki ujDi hui raat hain

sabz peDon se bichhDe hue pat hain

harf-e-haihat hain

ye tere hijr hi ke karamat hain

ab koi raushni

kam-nazar ki nigahon ko bhati nahin

koi sapnon ki lau

aankh ki putliyon mein ujala jagati nahin

ab sama'at ko koi madhurta lubhati nahin

koi hamdam nahin koi sathi nahin

nind aati nahin