tarana-e-yaum-e-mazdur

jise bhuuk kī aag garmā rahī hai

vo chūlhoñ kī ḳhālī patīlī kā naġhma

parosegā na.aroñ kī thālī sajā kar

ye din bhuuk ke taish khāne kā din hai

sunāmī kī hai aur na bhūchāl kī hai

na kashmīr kī hai na bangāl kī hai

jis āvāz par jaag uTThegī mamtā

vo kangāl bachchoñ ke kankāl kī hai

us āvāz ko gungunāne kā din hai

baḌe inqilābī haiñ muflis ke tevar

zamāne kī ayyāshiyoñ ko batā do

chalo niilī rātoñ kī chup bastiyoñ ko

saveroñ ke qadmoñ kī aahaT sunā do

mahal se nikaltā nahīñ hai jo sūraj

saḌak par use khīñch laane kā din hai

jalā Daalo va.adoñ kī jhūTī kitābeñ

ġhalat likhne vaalā qalam toḌ Daalo

bajā do takabbur kī īñToñ se īñTeñ

dar-o-bām-e-jāh-o-hasham toḌ Daalo

pahāḌoñ meñ rasta banāne kā din hai

ye din bhuuk ke taish khāne kā din hai

jise bhuk ki aag garma rahi hai

wo chulhon ki KHali patili ka naghma

parosega naron ki thaali saja kar

ye din bhuk ke taish khane ka din hai

sunami ki hai aur na bhuchaal ki hai

na kashmir ki hai na bangal ki hai

jis aawaz par jag uTThegi mamta

wo kangal bachchon ke kankal ki hai

us aawaz ko gungunane ka din hai

baDe inqilabi hain muflis ke tewar

zamane ki ayyashiyon ko bata do

chalo nili raaton ki chup bastiyon ko

saweron ke qadmon ki aahaT suna do

mahal se nikalta nahin hai jo suraj

saDak par use khinch lane ka din hai

jala Dalo wadon ki jhuTi kitaben

ghalat likhne wala qalam toD Dalo

baja do takabbur ki inTon se inTen

dar-o-baam-e-jah-o-hasham toD Dalo

pahaDon mein rasta banane ka din hai

ye din bhuk ke taish khane ka din hai