bebasi

kab talak sabr karegī ye bhalā fitrat-e-sāz

naġhma-e-shauq kī aatī nahīñ koī āvāz

surḳh joḌe kī tamannā.eñ bhī dam toḌ chukīñ

Dhal ga.e kitne damakte hue chehroñ ke gudāz

koī aayā nahīñ ḳhvāboñ kā hasīñ shahzāda

aur ummīd meñ hotī hī ga.ī 'umr darāz

ḳhatm sab ho ga.iiñ ārā.ish-o-zeb-o-zīnat

koī kis ke liye kartā rahe āḳhir ye tarāz

rang phīke haiñ umangeñ huiiñ reza reza

ziist be-mā'nī haqīqat ke sivā jaise majāz

hogī kab ḳhatm zamāne se vabā lālach kī

vo kahāñ haiñ ke jinheñ apnī basīrat pe hai naaz

kitnī tahrīkeñ zamāne meñ chalī haiñ lekin

in masā.il pe kabhī kyuuñ nahīñ uThtī āvāz

dars dete haiñ musāvāt kā din raat magar

apnī ḳhū ke liye rakhte haiñ rivājoñ kā javāz

kyuuñ haiñ murjhā.īñ javānī meñ mahaktī kaliyāñ

kyuuñ aziyyat se bhare haiñ ye samājī andāz

bebasī pūchh rahī hai yahī insānoñ se

kyuuñ mayassar nahīñ zar ke binā koī dam-sāz

nāsehā kaash mavā'iz ke hoñ 'unvān jahez

kyā 'ajab hai ke diloñ tak tirī pahuñche āvāz

dard ke rang dikhā detā hai is duniyā ko

aur to kuchh nahīñ 'irshād' ko hāsil e'jāz

kab talak sabr karegi ye bhala fitrat-e-saz

naghma-e-shauq ki aati nahin koi aawaz

surKH joDe ki tamannaen bhi dam toD chukin

Dhal gae kitne damakte hue chehron ke gudaz

koi aaya nahin KHwabon ka hasin shahzada

aur ummid mein hoti hi gai 'umr daraaz

KHatm sab ho gain aaraish-o-zeb-o-zinat

koi kis ke liye karta rahe aaKHir ye taraaz

rang phike hain umangen huin reza reza

zist be-ma'ni haqiqat ke siwa jaise majaz

hogi kab KHatm zamane se waba lalach ki

wo kahan hain ke jinhen apni basirat pe hai naz

kitni tahriken zamane mein chali hain lekin

in masail pe kabhi kyun nahin uThti aawaz

dars dete hain musawat ka din raat magar

apni KHu ke liye rakhte hain riwajon ka jawaz

kyun hain murjhain jawani mein mahakti kaliyan

kyun aziyyat se bhare hain ye samaji andaz

bebasi puchh rahi hai yahi insanon se

kyun mayassar nahin zar ke bina koi dam-saz

naseha kash mawa'iz ke hon 'unwan jahez

kya 'ajab hai ke dilon tak teri pahunche aawaz

dard ke rang dikha deta hai is duniya ko

aur to kuchh nahin 'irshad' ko hasil e'jaz