aa’raf

kahīñ duur hañstī huī barf kī pattiyāñ

surḳh bādal ke chhitnār se TuuT kar

sabz khetoñ munaqqash chhatoñ jagmagātī huī shāh-rāhoñ ko

ik pal meñ Dhāñpeñ

mulā.em mahakte hue jism par apnī rangat nichhāvar kareñ

ḳhuun tak ko thirakne pe uksātī jaa.eñ

kahīñ duur dhartī kī pichkī huī jild se

kaale gunjān jangal nikal kar

har ik chiiz ko apne sāyoñ se Dhāñpeñ

biphartī huī naddiyoñ vahshī āñkhoñ dhūeñ ke sañdesoñ ko

kaalī ridā meñ chhupā.eñ

baḌī duur tak apnī parchhā.iyoñ se

anokhā sā ik ḳhauf phailāte jaa.eñ

ghane gahre pattoñ meñ dahke hue jism par kaalī rangat nichhāvar kareñ

ḳhuun ke khaulne ke tamāshe dikhā.eñ

mirī samt dekho jahāñ maiñ khaḌā huuñ

na bādal kā chhitnār mujh par kabhī ḳhūb-rū pattiyāñ pheñktā hai

na jangal kī kaalī ridā hī mujhe Dhāñptī hai

mire chāroñ jānib har ik chiiz maTyālī rangat meñ khoī huī hai

lahū munjamid hai

fazā par bujhī gard kā sā.ibāñ hai

zamīñ ek phailā huā ḳhāk-dāñ hai

kahin dur hansti hui barf ki pattiyan

surKH baadal ke chhitnar se TuT kar

sabz kheton munaqqash chhaton jagmagati hui shah-rahon ko

ek pal mein Dhanpen

mulaem mahakte hue jism par apni rangat nichhawar karen

KHun tak ko thirakne pe uksati jaen

kahin dur dharti ki pichki hui jild se

kale gunjaan jangal nikal kar

har ek chiz ko apne sayon se Dhanpen

bipharti hui naddiyon wahshi aankhon dhuen ke sandeson ko

kali rida mein chhupaen

baDi dur tak apni parchhaiyon se

anokha sa ek KHauf phailate jaen

ghane gahre patton mein dahke hue jism par kali rangat nichhawar karen

KHun ke khaulne ke tamashe dikhaen

meri samt dekho jahan main khaDa hun

na baadal ka chhitnar mujh par kabhi KHub-ru pattiyan phenkta hai

na jangal ki kali rida hi mujhe Dhanpti hai

mere chaaron jaanib har ek chiz maTyali rangat mein khoi hui hai

lahu munjamid hai

faza par bujhi gard ka saiban hai

zamin ek phaila hua KHak-dan hai