kis se mohabbat hai

batā.ūñ kyā tujhe ai ham-nashīñ kis se mohabbat hai

maiñ jis duniyā meñ rahtā huuñ vo is duniyā kī aurat hai

sarāpā rañg-o-bū hai paikar-e-husn-o-latāfat hai

bahisht-e-gosh hotī haiñ guhar-afshāniyāñ us kī

vo mere āsmāñ par aḳhtar-e-sub.h-e-qayāmat hai

surayyā-baḳht hai zohra-jabīñ hai māh-e-tal.at hai

mirā īmāñ hai merī zindagī hai merī jannat hai

merī āñkhoñ ko ḳhīra kar ga.iiñ tābāniyāñ us kī

vo ik mizrāb hai aur chheḌ saktī hai rag-e-jāñ ko

vo chiñgārī hai lekin phūñk saktī hai gulistāñ ko

vo bijlī hai jalā saktī hai saarī bazm-e-imkāñ ko

abhī mere hī dil tak haiñ sharer-sāmāniyāñ us kī

zabāñ par haiñ abhī ismat o taqdīs ke naġhme

vo baḌh jaatī hai is duniyā se aksar is qadar aage

mire taḳh.īl ke baazū bhī us ko chhū nahīñ sakte

mujhe hairān kar detī haiñ nukta-dāniyāñ us kī

jabīñ par sāya-gustar partav-e-qindīl-e-rahbānī

azār-e-narm-o-nāzuk par shafaq kī rañg-afshānī

qadam par loTtī hai azmat-e-tāj-e-sulaimānī

azal se mo'taqid hai mahfil-e-nūrāniyāñ us kī

adā.eñ le ke aa.ī hai vo fitrat ke ḳhazānoñ se

jagā saktī hai mahfil ko nazar ke tāzyānoñ se

vo malka hai ḳhirāj us ne liye haiñ bostānoñ se

bas ik maiñ ne hī aksar kī haiñ nā-farmāniyāñ us kī

vo merī jur.atoñ par be-niyāzī kī sazā denā

havas kī zulmatoñ par naaz kī bijlī girā denā

nigāh-e-shauq kī bebākiyoñ par muskurā denā

junūñ ko dars-e-tamkīñ de ga.iiñ nādāniyāñ us kī

vafā ḳhud kī hai aur merī vafā ko āzmāyā hai

mujhe chāhā hai mujh ko apnī āñkhoñ par biThāyā hai

mirā har sher tanhā.ī meñ us ne gungunāyā hai

sunī haiñ maiñ ne aksar chhup ke naġhma-ḳhvāniyāñ us kī

mire chehre pe jab bhī fikr ke āsār paa.e haiñ

mujhe taskīn dī hai mere andeshe miTā.e haiñ

mire shāne pe sar tak rakh diyā hai giit gaa.e haiñ

mirī duniyā badal detī haiñ ḳhush-alhāniyāñ us kī

lab-e-lālīñ pe lākhā hai na ruḳhsāroñ pe ġhāza hai

jabīñ-e-nūr-afshāñ par na jhūmar hai na Tiikā hai

javānī hai suhāg us kā tabassum us kā gahnā hai

nahīñ ālūda-e-zulmat sahar-dāmāniyāñ us kī

koī mere sivā us kā nishāñ pā hī nahīñ saktā

koī us bārgāh-e-nāz tak jā hī nahīñ saktā

koī us ke junūñ kā zamzama gā hī nahīñ saktā

jhalaktī haiñ mire ash.ār meñ jaulāniyāñ us kī

bataun kya tujhe ai ham-nashin kis se mohabbat hai

main jis duniya mein rahta hun wo is duniya ki aurat hai

sarapa rang-o-bu hai paikar-e-husn-o-latafat hai

bahisht-e-gosh hoti hain guhar-afshaniyan us ki

wo mere aasman par aKHtar-e-subh-e-qayamat hai

surayya-baKHt hai zohra-jabin hai mah-e-talat hai

mera iman hai meri zindagi hai meri jannat hai

meri aankhon ko KHira kar gain tabaniyan us ki

wo ek mizrab hai aur chheD sakti hai rag-e-jaan ko

wo chingari hai lekin phunk sakti hai gulistan ko

wo bijli hai jala sakti hai sari bazm-e-imkan ko

abhi mere hi dil tak hain sharer-samaniyan us ki

zaban par hain abhi ismat o taqdis ke naghme

wo baDh jati hai is duniya se aksar is qadar aage

mere taKHil ke bazu bhi us ko chhu nahin sakte

mujhe hairan kar deti hain nukta-daniyan us ki

jabin par saya-gustar partaw-e-qindil-e-rahbani

azar-e-narm-o-nazuk par shafaq ki rang-afshani

qadam par loTti hai azmat-e-taj-e-sulaimani

azal se mo'taqid hai mahfil-e-nuraniyan us ki

adaen le ke aai hai wo fitrat ke KHazanon se

jaga sakti hai mahfil ko nazar ke tazyanon se

wo malka hai KHiraj us ne liye hain bostanon se

bas ek main ne hi aksar ki hain na-farmaniyan us ki

wo meri juraton par be-niyazi ki saza dena

hawas ki zulmaton par naz ki bijli gira dena

nigah-e-shauq ki bebakiyon par muskura dena

junun ko dars-e-tamkin de gain nadaniyan us ki

wafa KHud ki hai aur meri wafa ko aazmaya hai

mujhe chaha hai mujh ko apni aankhon par biThaya hai

mera har sher tanhai mein us ne gungunaya hai

suni hain main ne aksar chhup ke naghma-KHwaniyan us ki

mere chehre pe jab bhi fikr ke aasar pae hain

mujhe taskin di hai mere andeshe miTae hain

mere shane pe sar tak rakh diya hai git gae hain

meri duniya badal deti hain KHush-alhaniyan us ki

lab-e-lalin pe lakha hai na ruKHsaron pe ghaza hai

jabin-e-nur-afshan par na jhumar hai na Tika hai

jawani hai suhag us ka tabassum us ka gahna hai

nahin aaluda-e-zulmat sahar-damaniyan us ki

koi mere siwa us ka nishan pa hi nahin sakta

koi us bargah-e-naz tak ja hi nahin sakta

koi us ke junun ka zamzama ga hi nahin sakta

jhalakti hain mere ashaar mein jaulaniyan us ki