dhuan

phir usī raah se guzrā huuñ jahāñ

raat bhar zaḳhm-e-vafā kī sūrat

ik darīcha sā khulā rahtā thā

ek dīvār pe niim āvezāñ

chand guzre hue ḳhvāboñ kī kitāb

ek tasvīr thī maazī kā hisāb

jis par andesha-e-fardā ban kar

koī saayā sā jhukā rahtā thā

kisī nau-ḳhez tamannā kī tarah

koī qindīl jalā kartī thī

jis ke ubhre hue sho'le se havā

rāz-dārāna milā kartī thī

kuchh 'ajab rang kī bastī thī vo

koī mausam ho mahaktī thī vo

kuchh 'ajab log the ābād vahāñ

apne ḳhvāboñ meñ ḳhayāloñ meñ magan

aise shādāb ki shādāb bahut

aise ḳhush-bāsh ki sūraj kī kiran

aise nāyāb ki nāyāb bahut

kuchh baras baa'd musāfir kī tarah

phir usī raah se guzrā huuñ magar

dekhtā kyā huuñ ki vo log nahīñ

ek vahshat hai sar-e-rāhguzar

na vo bastī hai na bastī ke makīñ

na vo tasvīr na dīvār na dar

na vo saayā na vo qindīl kahīñ

na vo ḳhush-bū na havāoñ kā safar

aur hī bojh liye hai vo zamīñ

us vafā-kesh darīche kī jagah

sang-o-faulād ke rishte se bañdhī

koī saffāk koī dushman-e-jāñ

ek pur hech 'imārat hai jahāñ

dekhtā huuñ to taras aatā hai

aise be-kal haiñ hazāroñ insāñ

mom kī tarh pighalte haiñ badan

aur rah rah ke nikaltā hai dhuāñ

phir usi rah se guzra hun jahan

raat bhar zaKHm-e-wafa ki surat

ek daricha sa khula rahta tha

ek diwar pe nim aawezan

chand guzre hue KHwabon ki kitab

ek taswir thi mazi ka hisab

jis par andesha-e-farda ban kar

koi saya sa jhuka rahta tha

kisi nau-KHez tamanna ki tarah

koi qindil jala karti thi

jis ke ubhre hue sho'le se hawa

raaz-darana mila karti thi

kuchh 'ajab rang ki basti thi wo

koi mausam ho mahakti thi wo

kuchh 'ajab log the aabaad wahan

apne KHwabon mein KHayalon mein magan

aise shadab ki shadab bahut

aise KHush-bash ki suraj ki kiran

aise nayab ki nayab bahut

kuchh baras ba'd musafir ki tarah

phir usi rah se guzra hun magar

dekhta kya hun ki wo log nahin

ek wahshat hai sar-e-rahguzar

na wo basti hai na basti ke makin

na wo taswir na diwar na dar

na wo saya na wo qindil kahin

na wo KHush-bu na hawaon ka safar

aur hi bojh liye hai wo zamin

us wafa-kesh dariche ki jagah

sang-o-faulad ke rishte se bandhi

koi saffak koi dushman-e-jaan

ek pur hech 'imarat hai jahan

dekhta hun to taras aata hai

aise be-kal hain hazaron insan

mom ki tarh pighalte hain badan

aur rah rah ke nikalta hai dhuan