mahak

mire vatan tirī miTTī kī sauñdhī sauñdhī mahak

gul-e-iram kī mahak se 'azīz-tar hai mujhe

ye sauñdhī sauñdhī mahak zehn meñ ubhārtī hai

mire ab-o-jad-e-'ālī ke tābnāk nuqūsh

mire ab-o-jad-e-'ālī ki jin kī 'azmat ne

yahāñ jalā.e the irfān-o-āgahī ke charāġh

vafā-o-mehr-o-mohabbat ke āshtī ke charāġh

vatan kī 'izzat-o-nāmūs ke ḳhudī ke charāġh

charāġh jin ko farozāñ kiyā ba-faiz-e-junūñ

mire ab-o-jad-e-'ālī ne apnā ḳhuuñ de kar

vo ḳhuun jis meñ harārat thī aur nuur bhī thā

javān umangoñ kā nashsha bhī thā shu'ūr bhī thā

mire vatan tirī miTTī kī sauñdhī sauñdhī mahak

gul-e-iram kī mahak se 'azīz-tar hai mujhe

ye sauñdhī sauñdhī mahak zehn meñ ubhārtī hai

mire jiyāle rafīqoñ ke tābnāk nuqūsh

mire jiyāle rafīq āhanī irāda liye

jo rah-guzār-e-nayā-gāñ pe gām-zan ho kar

jahāñ se dād-e-shujā’at qubūl karte hue

lahū kā ātishīñ nazrāna de gaye haiñ abhī

ki bujh na jaa.eñ kahīñ bād-e-jabr ke hāthoñ

charāġh jin ko farozāñ kiyā ba-faiz-e-junūñ

mire ab-o-jad-e-‘ālī ne apnā ḳhuuñ de kar

aur aaj jin kī ziyā hai mirī baqā kī amiiñ

mere watan teri miTTi ki saundhi saundhi mahak

gul-e-iram ki mahak se 'aziz-tar hai mujhe

ye saundhi saundhi mahak zehn mein ubhaarti hai

mere ab-o-jad-e-'ali ke tabnak nuqush

mere ab-o-jad-e-'ali ki jin ki 'azmat ne

yahan jalae the irfan-o-agahi ke charagh

wafa-o-mehr-o-mohabbat ke aashti ke charagh

watan ki 'izzat-o-namus ke KHudi ke charagh

charagh jin ko farozan kiya ba-faiz-e-junun

mere ab-o-jad-e-'ali ne apna KHun de kar

wo KHun jis mein hararat thi aur nur bhi tha

jawan umangon ka nashsha bhi tha shu'ur bhi tha

mere watan teri miTTi ki saundhi saundhi mahak

gul-e-iram ki mahak se 'aziz-tar hai mujhe

ye saundhi saundhi mahak zehn mein ubhaarti hai

mere jiyale rafiqon ke tabnak nuqush

mere jiyale rafiq aahani irada liye

jo rah-guzar-e-naya-gan pe gam-zan ho kar

jahan se dad-e-shuja’at qubul karte hue

lahu ka aatishin nazrana de gaye hain abhi

ki bujh na jaen kahin baad-e-jabr ke hathon

charagh jin ko farozan kiya ba-faiz-e-junun

mere ab-o-jad-e-‘ali ne apna KHun de kar

aur aaj jin ki ziya hai meri baqa ki amin