insan ka sawal

mahakte hue lāla-zāroñ meñ dekho to maiñ huuñ

chamakte hue chāñd tāroñ meñ dekho to maiñ huuñ

idhar maiñ udhar maiñ

safīnā safīnā bhañvar hī bhañvar meñ

samundar kī lahroñ meñ dekho

kināroñ meñ dekho

to maiñ huuñ

nahīñ maiñ nahīñ huuñ

chaman meñ tirā 'aks hai

har nazāre meñ tū hai

sukūt-e-shab-e-māh tū hai

sulagte hue har sitāre meñ tū hai

ġhul-e-tar meñ tū hai sharāre meñ tū hai

samundar kī har mauj meñ tū kināre meñ tū hai

magar vo janāza jise log le jā rahe haiñ

na tū hai na maiñ huuñ

batā tū kahāñ hai batā maiñ kahāñ huuñ

mahakte hue lala-zaron mein dekho to main hun

chamakte hue chand taron mein dekho to main hun

idhar main udhar main

safina safina bhanwar hi bhanwar mein

samundar ki lahron mein dekho

kinaron mein dekho

to main hun

nahin main nahin hun

chaman mein tera 'aks hai

har nazare mein tu hai

sukut-e-shab-e-mah tu hai

sulagte hue har sitare mein tu hai

ghul-e-tar mein tu hai sharare mein tu hai

samundar ki har mauj mein tu kinare mein tu hai

magar wo janaza jise log le ja rahe hain

na tu hai na main hun

bata tu kahan hai bata main kahan hun