KHizan ki wo raat

ḳhizāñ kī vo raat jis meñ har-sū ravish ravish par

hamāre bikhre hue irāde the yaad ke rāstoñ pe jaltī

mirī samajh aur mire lahū kī hadoñ se aage chalī ga.ī hai

vo raat jis meñ ki der tak ham

ne taash ke pur-fareb pattoñ se

apnī taqdīr ko badalne kī chand abtar sī koshisheñ kiiñ

pighaltī sham'oñ se faal lene ke baa'd

be-rabt guftugū meñ yaqīn se ye kahā ki sham'eñ

bujheñ to phir saath hī hamāre tamām rastoñ meñ sub.h hogī

sañvār kar barg-o-bār apne hī sabz bāġhoñ ke

be-takalluf hameñ yaqīñ thā ki aaj is be-sabāt duniyā

ke faisloñ aur muqaddaroñ se hamārā rishta aTal nahīñ hai

magar añdherā huā to yuuñ jaise tum kisī dūsre kināre

se jā lage ho diyā salā.ī kī raushnī meñ

kisī ga.e-guzre rāste ko talāsh karte pighal rahe ho

KHizan ki wo raat jis mein har-su rawish rawish par

hamare bikhre hue irade the yaad ke raston pe jalti

meri samajh aur mere lahu ki hadon se aage chali gai hai

wo raat jis mein ki der tak hum

ne tash ke pur-fareb patton se

apni taqdir ko badalne ki chand abtar si koshishen kin

pighalti sham'on se fal lene ke ba'd

be-rabt guftugu mein yaqin se ye kaha ki sham'en

bujhen to phir sath hi hamare tamam raston mein subh hogi

sanwar kar barg-o-bar apne hi sabz baghon ke

be-takalluf hamein yaqin tha ki aaj is be-sabaat duniya

ke faislon aur muqaddaron se hamara rishta aTal nahin hai

magar andhera hua to yun jaise tum kisi dusre kinare

se ja lage ho diya salai ki raushni mein

kisi gae-guzre raste ko talash karte pighal rahe ho