banafsha aur farishte

maiñ ne kuchh roz pahle

banafshe ke khilne kī piile gulāb aur shabnam ke qatroñ kī

bāteñ kahī thiiñ

banafsha khilā aur piile gulābī paroñ par

vahī kuchh huā jo hamesha se hotā hai

sabze kī chhat par

parinde ne har aate jaate musāfir se pūchhā

batāo ḳhizāñ saal bhar kis jazīre meñ rahtī hai

banafshe kī kamzor Tahnī pe nanhe farishte

mirī nā-samajh aañkh un ko parindoñ ke qālib meñ

bulbul yā chiḌiyā samajhtī hai

bātoñ meñ Duube haiñ jaise mohabbat ke jaadū meñ

din raat miTte haiñ bante haiñ phir Duub jaate haiñ

tum kuchh kaho tum nihāñ ke pare dekhte ho

mirī aañkh hāzir ko hāzir samajhtī hai maiñ apne manzar kā

pāyāb nuqta huuñ manzar se bāhar

mirī aañkh jo dekhtī hai vo niilā falak hai

yā uḌte parindoñ ke mānūs lashkar haiñ shahr kī āhaTeñ haiñ

banafsha kabhī mere dil meñ ugegā

kabhī phuul mere dil-o-jān meñ ug sakeñge

farishte mire saath aañsū chuneñge alam-nāk duniyā meñ

kaale tarāzū kā charchā kareñge

mirī qaum 'azmat kī nā-mahramī se kināra karegī

main ne kuchh roz pahle

banafshe ke khilne ki pile gulab aur shabnam ke qatron ki

baaten kahi thin

banafsha khila aur pile gulabi paron par

wahi kuchh hua jo hamesha se hota hai

sabze ki chhat par

parinde ne har aate jate musafir se puchha

batao KHizan sal bhar kis jazire mein rahti hai

banafshe ki kamzor Tahni pe nanhe farishte

meri na-samajh aankh un ko parindon ke qalib mein

bulbul ya chiDiya samajhti hai

baaton mein Dube hain jaise mohabbat ke jadu mein

din raat miTte hain bante hain phir Dub jate hain

tum kuchh kaho tum nihan ke pare dekhte ho

meri aankh hazir ko hazir samajhti hai main apne manzar ka

payab nuqta hun manzar se bahar

meri aankh jo dekhti hai wo nila falak hai

ya uDte parindon ke manus lashkar hain shahr ki aahaTen hain

banafsha kabhi mere dil mein ugega

kabhi phul mere dil-o-jaan mein ug sakenge

farishte mere sath aansu chunenge alam-nak duniya mein

kale taraazu ka charcha karenge

meri qaum 'azmat ki na-mahrami se kinara karegi