wictoriya memorial

chalo aaj duniyā ko dekheñ

ye victoriya kā mahal hai

magar ab ye tafrīh kā ek markaz huā hai

libāsoñ kitāboñ qalam aur talvār kī ik numā.ish lagī hai

ka.ī qīmtī aur nāyāb daftar khule haiñ

ki jin meñ ka.ī laaT sāhab kī tahsīn meñ kuchh qasīde likhe haiñ

farāmīn-e-shāhī meñ dīmak lagī hai

ka.ī panting meñ re'āyā jo maujūd haiñ hāshiye par ke hoñToñ pe patthar lage haiñ

jabīñ par charāġhoñ kī raushan laḌī hai

magar in ke nīche siyāhī khaḌī hai

baḌe shauq-o-hasrat se sayyāh dekhe magar chhū na paa.e

haqīqat 'ayāñ ho na jaa.e

mahal ke shah-e-dar pe victoriya sang-e-marmar pe baiThī huī hai

koī hoñT chūme koī gudgudī bhī lagā.e

ḳhamoshī se dekhe zabāñ tak na khole

zarā duur hōgli nadī apnī raftār se bah rahī hai

hazāroñ baras ke tamavvuj ke qisse ko suntī sunātī chalī aa rahī hai

chalo aaj duniya ko dekhen

ye wictoriya ka mahal hai

magar ab ye tafrih ka ek markaz hua hai

libason kitabon qalam aur talwar ki ek numaish lagi hai

kai qimti aur nayab daftar khule hain

ki jin mein kai laT sahab ki tahsin mein kuchh qaside likhe hain

faramin-e-shahi mein dimak lagi hai

kai panting mein re'aya jo maujud hain hashiye par ke honTon pe patthar lage hain

jabin par charaghon ki raushan laDi hai

magar in ke niche siyahi khaDi hai

baDe shauq-o-hasrat se sayyah dekhe magar chhu na pae

haqiqat 'ayan ho na jae

mahal ke shah-e-dar pe wictoriya sang-e-marmar pe baiThi hui hai

koi honT chume koi gudgudi bhi lagae

KHamoshi se dekhe zaban tak na khole

zara dur hoogli nadi apni raftar se bah rahi hai

hazaron baras ke tamawwuj ke qisse ko sunti sunati chali aa rahi hai