kahi aur an-kahi ke darmiyan be-sudh paDi ek nazm

rū-pahle badan kī siyah-posh laḌkī

ye kyā keh diyā tum ne ḳhāmosh laḌkī

ye kyā keh dayā tum ne

shaffāf lahroñ meñ paḌte hue nīlgūñ 'aks ko

ek mauj-e-qad-āvar ke hote hue raqs ko

ye kyā keh diyā tum ne

jangal kī bārish meñ sahmī huī bhīgtī mornī se

mire sāz-e-ḳhāmosh kī an-kahī rāgnī se

ye kyā keh diyā tum ne vishnū kī rangat ko oḌhe hue

niile mausam ke dil-dāda ik ajnabī shaḳhs ko

rafāqat ke lamhāt meñ kāñpne ke salīqe se nā-āshnā

munhanī shaḳhs ko

ye kyā keh diyā tum ne

apnī riyāzat ko taj kar chaTaḳhtī huī haDDiyoñ kī numā.ish pe majbūr bām-e-havas par khaḌī besvā mausamoñ kī kasāfat meñ maḳhmūr bahre tamaddun kī yalġhār se

ye kyā keh diyā tum ne ḳhāmosh laḌkī

kabhī vo bhī keh do ki jo guftugū kī hadoñ se sivā hai

suḳhan ke hasīñ silsila-hā-e-pur-shauq se māvarā hai

kahā hotā kuchh tum ne bātūnī laḌkī

ru-pahle badan ki siyah-posh laDki

ye kya keh diya tum ne KHamosh laDki

ye kya keh daya tum ne

shaffaf lahron mein paDte hue nilgun 'aks ko

ek mauj-e-qad-awar ke hote hue raqs ko

ye kya keh diya tum ne

jangal ki barish mein sahmi hui bhigti morni se

mere saz-e-KHamosh ki an-kahi ragni se

ye kya keh diya tum ne wishnu ki rangat ko oDhe hue

nile mausam ke dil-dada ek ajnabi shaKHs ko

rafaqat ke lamhat mein kanpne ke saliqe se na-ashna

munhani shaKHs ko

ye kya keh diya tum ne

apni riyazat ko taj kar chaTaKHti hui haDDiyon ki numaish pe majbur baam-e-hawas par khaDi beswa mausamon ki kasafat mein maKHmur bahre tamaddun ki yalghaar se

ye kya keh diya tum ne KHamosh laDki

kabhi wo bhi keh do ki jo guftugu ki hadon se siwa hai

suKHan ke hasin silsila-ha-e-pur-shauq se mawara hai

kaha hota kuchh tum ne baatuni laDki