jawanon se KHitab

javāno ho ga.ī sub.h-e-'amal bedār ho jaao

zamāna kaam karne kā hai ab hushyār ho jaao

fareb-e-amn ke sāġhar kī ye badmastiyāñ kab tak

sahoge be-ḳhudī meñ aah jaur-e-āsmāñ kab tak

rabāb-e-lutf ke tāroñ kī jumbish maut-sāmāñ hai

vo dekho sāmne uThtī huī shorish kā tūfāñ hai

qayāmat hai ki tum meñ hai vahī afsurdagī ab tak

mai-e-ġhaflat ke matvālo tumhārī bebasī kab tak

bahut sīkhā hai tum ne zor bāzū-e-sahāfat kā

batāo kuchh tumheñ ehsās bhī hai apnī tāqat kā

Dubo de saare 'ālam ko vo bahr-e-be-karāñ tum ho

tabar ho teġh ho tūfān ho barq-o-sināñ tum ho

tumhārī aañkh kī jotoñ se vo sho'le nikalte haiñ

ki jin se āsmānī bijliyoñ ke par jhulaste haiñ

havā-e-tund kahte haiñ tumhārī sard-āhoñ ko

bujhā detī haiñ jo zālim hukūmat ke charāġhoñ ko

sināñ kyā chiiz hai aur top kyā shamshīr kyā shai hai

tumhāre zor-e-bāzū ke muqābil tiir kyā shai hai

vahī tum ho ki fitrat jin ke dil kī jang-koshī hai

tumhārī ziist kā bas ek maqsad sarfaroshī hai

vo dekho naav se mañjhdār meñ kis ne pukārā hai

tumhīñ ko nā-ḳhudā.ī ke liye bhārat ne taakā hai

bhañvar se apnī kashti-e-tamannā paar ho jaa.e

agar tum nā-ḳhudā ban jaao beḌā paar ho jaa.e

yahī hai vaqt uThTho bar-sar-e-paikār ho jaao

javāno sarfaroshī ke liye tayyār ho jaao

jawano ho gai subh-e-'amal bedar ho jao

zamana kaam karne ka hai ab hushyar ho jao

fareb-e-amn ke saghar ki ye badmastiyan kab tak

sahoge be-KHudi mein aah jaur-e-asman kab tak

rabab-e-lutf ke taron ki jumbish maut-saman hai

wo dekho samne uThti hui shorish ka tufan hai

qayamat hai ki tum mein hai wahi afsurdagi ab tak

mai-e-ghaflat ke matwalo tumhaari bebasi kab tak

bahut sikha hai tum ne zor bazu-e-sahafat ka

batao kuchh tumhein ehsas bhi hai apni taqat ka

Dubo de sare 'alam ko wo bahr-e-be-karan tum ho

tabar ho tegh ho tufan ho barq-o-sinan tum ho

tumhaari aankh ki joton se wo sho'le nikalte hain

ki jin se aasmani bijliyon ke par jhulaste hain

hawa-e-tund kahte hain tumhaari sard-ahon ko

bujha deti hain jo zalim hukumat ke charaghon ko

sinan kya chiz hai aur top kya shamshir kya shai hai

tumhaare zor-e-bazu ke muqabil tir kya shai hai

wahi tum ho ki fitrat jin ke dil ki jang-koshi hai

tumhaari zist ka bas ek maqsad sarfaroshi hai

wo dekho naw se manjhdar mein kis ne pukara hai

tumhin ko na-KHudai ke liye bhaarat ne taka hai

bhanwar se apni kashti-e-tamanna par ho jae

agar tum na-KHuda ban jao beDa par ho jae

yahi hai waqt uThTho bar-sar-e-paikar ho jao

jawano sarfaroshi ke liye tayyar ho jao