مرگ آوارہ

پھر وہ ٹوٹا اک ستارہ آ گئی نازک گھڑی

پھر کسی کی بے کسی دامن پسارے ہے کھڑی

ہوک سی سینے میں اٹھی چوٹ سی دل پر پڑی

اے غم دل کیا کروں اے وحشت دل کیا کروں

پھر ہوا ہم سے جدا اک شاعر خانہ خراب

جیسے اک شبنم کا قطرہ جیسے دریا کا حباب

جیسے مفلس کی جوانی جیسے بیوہ کا شباب

اے غم دل کیا کروں اے وحشت دل کیا کروں

پھر دبا شعلہ بھڑک اٹھا ہے آخر کیا کروں

دل کا پیمانہ چھلک اٹھا ہے آخر کیا کروں

زخم سینے کا مہک اٹھا ہے آخر کیا کروں

اے غم دل کیا کروں اے وحشت دل کیا کروں

ظلم فطرت کے مظاہر ہیں نظر کے سامنے

اک طرف نادار شاعر ہیں نظر کے سامنے

سینکڑوں چنگیز و نادر ہیں نظر کے سامنے

اے غم دل کیا کروں اے وحشت دل کیا کروں

جی میں آتا ہے کہ سارے ساز و ساماں پھونک دوں

یہ محل یہ عیش و عشرت کے شبستاں پھونک دوں

تخت سلطاں کیا میں سارا قصر سلطاں پھونک دوں

اے غم دل کیا کروں اے وحشت دل کیا کروں

میں اگر چاہوں تو پھر مشکل ہے کیا میرے لئے

انقلابات جہاں کے در ہیں وا میرے لئے

پر مصیبت ہے مرا عہد وفا میرے لیے

اے غم دل کیا کروں اے وحشت دل کیا کروں

اے دل درد آشنا ساقی کے میخانے میں چل

ایشیا کے کیٹس کے رنگین کاشانے میں چل

یہ نہیں ممکن تو پھر اے دوست ویرانے میں چل

اے غم دل کیا کروں اے وحشت دل کیا کروں

ضبط کے دامن کو چھوڑوں یہ مری عادت نہیں

صرف آنسو ہی بہاؤں یہ مری فطرت نہیں

اور کوئی ہم نوا مل جائے یہ قسمت نہیں

اے غم دل کیا کروں اے وحشت دل کیا کروں

آنکھ میں آنسو کے قطرے ہیں نہ چہرے پر ملال

دل ہی دل میں مرگ آوارہ کا چبھتا ہے خیال

آہ لیکن کون جانے کون سمجھے دل کا حال

اے غم دل کیا کروں اے وحشت دل کیا کروں