ek painting

rang hī rang haiñ

in meñ koī sūrat nahīñ miltī

jise pahchān sakeñ

dā.eroñ aur ḳhatoñ se koī paikar

koī ḳhāka nahīñ bantā

jise ham jaan sakeñ

vo tanāsub vo tayaqqun vo ta'ayyun nahīñ

ham jis se shanāsā hoñ

jise maan sakeñ

vo ta.assur nahīñ jo zauq pe ehsān kare

kaif-e-nazzāra-e-tasvīr kā sāmān kare

is meñ mere liye phir bhī koī dil-sozī-e-pinhāñ hogī

jaise har jumbish-e-rang us kī mire ḳhuuñ meñ rahī ho barsoñ

jaise har dā.ere har ḳhat meñ mirī ziist kī har raat kaTī ho barsoñ

sho'la-gah jaise yahī ho mere har 'ahd-e-ḳhayālāt

kī āñchoñ ke liye

jalva-kash jaise yahī ho mirī nairangī-e-armāñ

kī uḌānoñ ke liye

merī har ek ġhamī aur ḳhushī kī ye nigah-dār rahī ho jaise

merī har tishnagī-e-rūh kī ye mahram-e-asrār rahī ho jaise

merī har sa'ī-e-safā ke liye ye sāhib-e-iqrār rahī ho jaise

merī har jiit har ik haar rahī ho jaise

rang hi rang hain

in mein koi surat nahin milti

jise pahchan saken

daeron aur KHaton se koi paikar

koi KHaka nahin banta

jise hum jaan saken

wo tanasub wo tayaqqun wo ta'ayyun nahin

hum jis se shanasa hon

jise man saken

wo tassur nahin jo zauq pe ehsan kare

kaif-e-nazzara-e-taswir ka saman kare

is mein mere liye phir bhi koi dil-sozi-e-pinhan hogi

jaise har jumbish-e-rang us ki mere KHun mein rahi ho barson

jaise har daere har KHat mein meri zist ki har raat kaTi ho barson

sho'la-gah jaise yahi ho mere har 'ahd-e-KHayalat

ki aanchon ke liye

jalwa-kash jaise yahi ho meri nairangi-e-arman

ki uDanon ke liye

meri har ek ghami aur KHushi ki ye nigah-dar rahi ho jaise

meri har tishnagi-e-ruh ki ye mahram-e-asrar rahi ho jaise

meri har sa'i-e-safa ke liye ye sahib-e-iqrar rahi ho jaise

meri har jit har ek haar rahi ho jaise