nazm

qais ne ishq kiyā

par shā.erī nahīñ kī

us ne lailā kī bāteñ

havāoñ se bagūloñ se daraḳhtoñ se aur beloñ se

phūloñ se aur ḳhushbū se kiiñ

qais ne ishq kiyā

aur apne ishq meñ qudrat ko shāmil kiyā

maiñ ne shā.erī kī

merī shā.erī meñ bhī havā.eñ bagūle daraḳht beleñ phuul

aur ḳhushbū shāmil haiñ

tab maiñ ne ishq nahīñ kiyā

maiñ ne jab ishq kiyā

to is meñ shāmil hue

tohfe mulāqāt ke tai-shuda vaqt āzmā.ish an-chāhe log

aur vo saarī duniyāvī chīzeñ

jo kabhī mohabbat kī dalīl nahīñ ho saktīñ

qais ne ishq kiya

par shaeri nahin ki

us ne laila ki baaten

hawaon se bagulon se daraKHton se aur belon se

phulon se aur KHushbu se kin

qais ne ishq kiya

aur apne ishq mein qudrat ko shamil kiya

main ne shaeri ki

meri shaeri mein bhi hawaen bagule daraKHt belen phul

aur KHushbu shamil hain

tab main ne ishq nahin kiya

main ne jab ishq kiya

to is mein shamil hue

tohfe mulaqat ke tai-shuda waqt aazmaish an-chahe log

aur wo sari duniyawi chizen

jo kabhi mohabbat ki dalil nahin ho saktin